2006 ජනවාරි 25 වනදා යුධ හමුදා මූලස්ථානයේ පිවිසුම් දොරටුව අසල දී එවකට යුද හමුදාපතිවරයා ලෙස කටයුතු කළ සරත් ෆොන්සේකා ඝාතනය කිරීමේ අරමුණින් එල්.ටී.ටී.ඊ බෝම්බකාරියක වන දුර්ගා නැමැත්තිය සිදුකළ මරාගෙන මැරෙන බෝම්බ ප්රහාරයට අධාර අනුබලදීම ඇතුළු චෝදනා 230ක් යටතේ හිටපු එල්.ටී.ටී.ඊ සාමාජිකයින් යැයි කියන විත්තිකරුවන් තිදෙනෙකුට එරෙහිව නීතිපතිවරයා පවරා ඇති නඩුවේ සාක්ෂි විභාගය අද (28) කොළඹ මහාධිකරණ විනිසුරු නවරත්න මාරසිංහ මහතා ඉදිරියේ පැවැත් වුණා.
එහිදී පැමිණිල්ල මෙහෙයවන ජ්යෙෂ්ඨ නියෝජ්ය සොලිසිටර් ජනරාල් ලක්මාලි කරුණානායකගේ මෙහෙයවීම යටතේ පැමිණිල්ලේ සාක්ෂිකරුවක් සාක්ෂි ලබාදුන් අතර වැඩිදුර සාක්ෂි විභාගය හෙට (29) දක්වා කල් තැබීමට විනිසුරුවරයා නියෝග කළා.
හෙට (29) දින විවෘත්ත අධිකරණය හමුවේ සාක්ෂිදීමට නියමිත සාක්ෂිකාරිය අසනීප තත්ත්වයෙන් ඇති බවට වාර්තා වී ඇති බැවින් ඇයගේ නිවසට වාහනයක් යවා හෝ ඇයව අනිවාර්යෙන්ම අධිකරණයට කැඳවීමට පියවර ගන්නා ලෙසට විනිසුරුවරයා එහිදී ත්රස්ත විමර්ශන කොට්ඨාසයට නියෝග කර සිටියා.
සෙල්වරාසා කිරුබාකරන් හෙවත් මොරිස් ශම්මුගලිංගම් සූරියකුමාර් හා තම්බයියා ප්රකාශ් හෙවත් ධනුෂ් නැමැති එම විත්තිකරුවන් අද (28) දින අධිකරණය හමුවට ඉදිරිපත් කර තිබුණා.
එකී මරාගෙන මැරෙන බෝම්බ ප්රහාරයෙන් සරත් ෆොන්සේකා බරපතල තුවාල ලබා තිබූ අතර, ඔහුගේ ආරක්ෂාවට යොදවා සිටි යුද හමුදා සැරයන්වරයකු, කෝප්රල්වරුන් තිදෙනෙකු ඇතුළු යුධ හමුදා සෙබළුන් කිහිප දෙනෙකු මිය ගොස් තවත් භට පිරිසක් තුවාල ලබා තිබුණා.
විත්තිය වෙනුවෙන් නීතීඥ සුරංග බණ්ඩාර, අස්ථික දේවේන්ද්ර, ආනෝල්ඩ් ප්රියන්තන් ඇතුළු නීතීඥ මඬුල්ලක් පෙනී සිටියා.
