නීතිවිරෝධී ලෙස ගෝන මස් විකිණීමට තැත් කළ පුද්ගලයින් තිදෙනකු අත්අඩංගුවට ගෙන තිබෙනවා.
ඔවුන් අද (26) දහවල් අත් අඩංගුවට ගෙන ඇත්තේ වවුනියාව – ඕමන්ත, කොන්දකාරකුලම් රක්ෂිතයේ දියි.
සැකකරුවන් විසින් ගෝනෙකු ඝාතනය කර; මස් කර රැගෙන යමින් සිටියදී ගෝන මස් කිලෝග්රෑම් 60ක් සමග අත්අඩංගුවට ගැනුණා.
මෙම වැටලීම වවුනියාව – පුලියන්කුලම පොලිස් විශේෂ කාර්ය බළකා නිලධාරීන් විසින් සිදු කරනු ලැබුවා.
සැකකරුවන් විසින් දැඩි ආරක්ෂිත සත්ත්වයෙකු ලෙස නම්කර ඇති ගෝනා මද්දක් අටවා අල්ලාගෙන ඇති අතර එම මාංශ වවුනියාව ප්රදේශයේ හෝටල් වෙත අලෙවි කිරීමට සුදානම් ව සිටි බවයි ප්රකාශ කර ඇත්තේ.
මස් කිලෝවක් රුපියල් 1500ත් 2000 අතර මුදලකට අලෙවි කරන බවත් සිදු කරන ලද මූලික විමර්ශනවල දී හෙළි ව තිබෙනවා.
අත්අඩංගුවට ගත් සැකකරුවන් වවුනියාව සහ ඔඩ්ඩුසුඩාන් ප්රදේශයේ පදිංචි අවුරුදු 22ත් 55 අතර වයසේ පසුවන්නන්.
සැකකරුවන් ඉදිරි නීතිමය ක්රියාමාර්ග සඳහා වවුනියාව වනජීවි කාර්යාලය වෙත භාරදීමට නියමිතයි.
