බස් රථ 03ක පරම අයිතිය අයිතිකරු වෙත පවරාදීම සඳහා පුද්ගලයෙකුගෙන් රුපියල් ලක්ෂ දෙකක මුදලක් අල්ලස් වශයෙන් ලබාගත් බව කියන සිද්ධියක් සම්බන්ධයෙන් රක්ෂිත බන්ධනාගාර ගත කර සිටින මෝටර් රථ දෙපාර්තමේන්තුවේ නාරාහේන්පිට කාර්යාලයේ නියෝජ්‍ය කොමසාරිස්වරයකු ඇතුළු සැකකරුවන් තිදෙනෙක් මෙම 11 වන දින දක්වා තවදුරටත් රක්ෂිත බන්ධනාගාරගත කරන ලෙස කොළඹ ප්‍රධාන මහෙස්ත්‍රාත් තිළිණ ගමගේ මහතා අද (08) නියෝග කළා.
සැකකාර කොමසාරිස්වරයා සිද්ධියේ පැමිණිලිකරු සමග දුරකථනයෙන් කළ සංවාද ඇතුළත් හඬ පට තිබේ නම් ඒවා අධිකරණයට ඉදිරිපත් කරන ලෙසට ද අධිකරණයෙන් නියම කරනු ලැබුවා.
එවැනි සංවාද ඇතුළත් හඩ පටයක් සිද්ධියේ විමර්ශනවල දී සොයාගෙන ඇති බවත්, එම හඬපට ඉදිරි නඩු වාරයේ දී අධිකරණයට ඉදිරිපත් කිරීමට අවශ්‍ය පියවර ගන්නා බව අදාළ විමර්ශන නිලධාරීන් අධිකරණයට දැන්වීමෙන් අනතුරුව එසේ නියම කළා.
එම දෙපාර්තමේන්තුවේ බස් රථ පැවරුම් අංශයේ නියෝජ්‍ය කොමසාරිස්වරයකු වන සජිත් වසන්ත වෙල්ගම එහි ලිපිකරුවකු වන කේ.ජගත් ශාන්තප්‍රිය සහ එම දෙපාර්තමේන්තුවේ සේවයෙහි යෙදී සිටිය දී අල්ලස් ගැනීමේ සිද්ධියක් සම්බන්ධයෙන් වැඩ තහනමට ලක්ව පසුව තැ‍රැව්කරුවකු ලෙස කටයුතු කළ බව කියන මර්වින් ජයන්ත ප්‍රනාන්දු නමැති සැකකරුවන් තිදෙනෙකුයි එසේ රක්ෂිත බන්ධනාගාර ගත කරන ලෙස නියෝග කළේ.
සැකකරුවන් පිරිස බස් රථයක පරම අයිතිය අයිතිකරු වෙත පවරාදීම සඳහා ඔහුගෙන් රුපියල් ලක්ෂ දෙකක මුදලක් ඉල්ලා ඇති බවත් එය ලබාදීමට කැමැත්ත පළ කර ඇති පැමිණිලිකාර පුද්ගලයා ඒ සම්බන්ධයෙන් අල්ලස් හෝ දූෂණ විමර්ශන කොමිෂන් සභාව වෙත දැනුම්දී ඇති බව ද පැමිණිල්ල මෙහෙයවූ විමර්ශන නිලධාරීන් අධිකරණයට දන්නවා තිබුණා.
පසුව එම විමර්ශන නිලධාරීන්ගේ උපදෙස් අනුව පැමිණිලිකාර පුද්ගලයා අදාළ සැකකරුවන්ට එම මුදල් රුපියල් 48,000 සහ රුපියල් 150,000 වශයෙන් අවස්ථා දෙකක දී ලබාදුන් අවස්ථාවේ දී එසේ අත්අඩංගුවට ගෙන ඇති බව ද සිද්ධිය සම්බන්ධයෙන් වැඩිදුරටත් කරුණු දක්වමින් විමර්ශන නිලධාරීන් අධිකරණයට දන්වා සිටියා.
