රුපියල් කෝටි පන්සියයක බදු රජයට අහිමි කරමින් රේගුවට හොර රහසේ සුඛෝපභෝගී මෝටර් රථ මෙරටට ගෙන්වීමේ සිද්ධියට අදාළව සැකකරුවන් දෙදෙනෙකු සන්තකයේ තිබී අල්ලස් කොමිසම විසින් සොයාගන්නා ලද ටොයෝටා වර්ගයේ ජීප් රථය වහාම අධිකරණයට භාර දෙන ලෙසට කොළඹ ප්‍රධාන මහේස්ත්‍රාත් තිළිණ ගමගේ මහතා නියෝගකර තිබෙනවා.
අමල් ක්‍රිශාන්ත දුමින්ද සහ රවීන්ද්‍ර විජේසූරිය යන සැකකරුවන් සන්තකයේ තිබී ටොයෝටා වර්ගයේ ජීප් රථයක් අධිකරණයට ඉදිරිපත් කරන ලෙස නියෝග කර තිබුණ ද එය සැකකරුවන් විසින් සඟවා තිබූ බව අල්ලස් කොමිසම අධිකරණයට දැනුම් දීමෙන් පසු මෙම නියෝගය සිදුකර තිබෙනවා.
එම ජීප් රථය අධිකරණයට සති දෙකක් ඇතුළත භාර දෙන ලෙසත්, රථය භාර දීමට නොහැකි නම් එහි වටිනාකම අනුව මුදල් අධිකරණයට භාර නොදුන්නොත් රක්ෂිත බන්ධනාගාරගත කරන ලෙසත් මහේස්ත්‍රාත්වරයා නියෝගකර තිබුණා.
මෙම ජීප් රථය රජයට භාර දුන් බව සැකකරු වෙනුවෙන් පෙනී සිටි නීතිඥවරයා අධිකරණයේදී මහේස්ත්‍රාත්වරයාට දැනුම් දී තිබෙනවා.
එම අවස්ථාවේදී මහේස්ත්‍රාත්වරයා සඳහන් කරනු ලැබුවේ අදාළ වාහනය ලබාදුන් බවට සඳහන් ලේඛනයක් අධිකරණයට ලබානොදීම නිසා එම සාක්ෂිය පිළිගැනීමට නොහැකි බවයි.
එලෙස ආනයනය කළ සුඛෝපභෝගී වාහන දෙසීයක් අතරින් මේ වන විට රජයට භාර දී ඇත්තේ වාහන විස්සක් පමණක් බවට අල්ලස් හෝ දූෂණ විමර්ශන කොමිසමේ රහසිගත බුද්ධි විමර්ශන ඒකකය ඉදිරිපත් කළ කරුණු සලකා බැලීමෙන් පසුව ප්‍රධාන මහේස්ත්‍රාත්වරයා එසේ නියෝග කෙරුණා.
නඩුව කැඳවූ අවස්ථාවේදී රහසිගත බුද්ධි ඒකකය අත්අඩංගුවට ගන්නා ලද රුපියල් කෝටි හයකට අධික වටිනාකමින් යුත් මිට්සුබිසී වර්ගයේ ජීප් රථයක් අධිකරණයට ඉදිරිපත් කර තිබෙන බව ද මීට පෙර නඩු දිනයකදී අධිකරණයේදී සඳහන් වුණා.
2015 වර්ෂයෙන් පසුව සුඛෝපභෝගී ජීප් රථ හා වාහන ශ්‍රී ලංකා රේගුවට හොර රහසේ ආනයනය කර මෝටර් රථ ප්‍රවාහන දෙපාර්තමේන්තුවේ දත්ත පද්ධතියට ව්‍යාජ තොරතුරු ඇතුළත් කරමින් 2005ට පෙර ආනයනය කළ සාමාන්‍ය රථ වාහන ලෙස ලියාපදිංචි කර ඇති සුඛෝපභෝගී වාහන දෙසීයක් (200) අත්අඩංගුවට ගැනීමට අල්ලස් කොමිසම මඟින් විමර්ශන සිදු කරන අතර, එම වාහන වහාම රජයට භාර දෙන ලෙසට මහේස්ත්‍රාත් අධිකරණය මඟින් නිකුත් කළ නියෝග ප්‍රකාරව මෙම සුඛෝපභෝගී ජීප් රථය ඊයේ (05) මහේස්ත්‍රාත්වරයා වෙත ඉදිරිපත් කර තිබුණා.
කොමිසම ඉදිරිපත් කළ කරුණු සලකා බැලූ මහේස්ත්‍රාත්වරයා රථ අත්අඩංගුවට ගැනීම මෙන්ම එලෙස රජයට පාඩු කළ සැකකරුවන් ද වහා
අත්අඩංගුවට ගෙන අධිකරණයට ඉදිරිපත් කිරීම කොමිසම සතු වගකීම බව පෙන්වා දෙමින් සැකකරුවන්ද අත්අඩංගුවට ගන්නා ලෙසට නියෝග කළා.
ඒ අනුව ඉදිරිපත් වූ කරුණු සලකා බැලූ ප්‍රධාන මහේස්ත්‍රාත්වරයා අදාළ රථය නීත්‍යනුකූලව ක්‍රියාදාම කිරීමට ශ්‍රී ලංකා රේගුවට භාර දෙන ලෙසට නියෝග කරමින් සෙසු වාහන සම්බන්ධයෙන් විමර්ශන ප්‍රගතිය ලබන 25 වනදා කිරීමට නියෝග කරන ලදී.
