බස්නාහිර, සබරගමුව සහ වයඹ පළාත්වලත් මහනුවර, නුවරඑළිය, ගාල්ල සහ මාතර දිස්ත්‍රික්කවලත් විටින් විට වැසි ඇති වන බව කාලගුණ විද්‍යා දෙපාර්තමේන්තුව නිවේදනය කරනවා.
එම නිවේදනයේ දැක්වෙන්නේ; මාතලේ සහ හම්බන්තොට දිස්ත්‍රික්කවලට ද වැසිවාර කිහිපයක් ඇතිවිය හැකි බවයි.
මධ්‍යම කඳුකරයේ බටහිර බෑවුම් ප්‍රදේශවලත්, උතුරු, උතුරු-මැද සහ වයඹ පළාත්වලත් ත්‍රිකුණාමලය, හම්බන්තොට සහ මොණරාගල දිස්ත්‍රික්කවලත් විටින් විට පැ.කි.මී. 40-50 ක පමණ තද සුළං ඇතිවිය හැකි බවත් එහි සඳහන්.
මේ අතර ධීවර හා නාවික කටයුතුවල යෙදෙන ප්‍රජාවට ද කාලගුණ විද්‍යා දෙපාර්තමේන්තුවෙන් රතු නිවේදනයක් නිකුත් කර තිබෙනවා.
ඒ සක්‍රීය නිරිතදිග මෝසම් කාලගුණය හේතුවෙන් අරාබි මුහුදු ප්‍රදේශයේ (උතුරු අක්ෂාංශ 06ත් 17ත් සහ නැගෙනහිර දේශාංශ 55 සහ 67ත් අතර මුහුදු ප්‍රදේශවල) ඉතා තද සුළං ඇති වීමේ හැකියාවක් පවතින බවයි කාලගුණ නිවේදනයේ දැක්වෙන්නේ.
එය පැයට කි.මී. 65-75ත් අගයක් දක්වා වර්ධනය විය හැකි බැවින් සැලකිලිමත් වන ලෙසටයි දැනුම්දී ඇත්තේ.
එමෙන්ම මේ වනවිටත් (27) එම ඉහත සඳහන් කළ මුහුදු කලාපවල සිටින ධීවරයින් හෝ නාවිකයින් ආරක්ෂිත ස්ථාන කරා හෝ ගොඩබිම වෙත පැමිණෙන ලෙසට ද දැනුම්දී තිබෙනවා.
