වතු කම්කරු වැටුප් වැඩි කරන ලෙස නියම කරමින් කම්කරු අමාත්‍යවරයා විසින් නිකුත් කර තිබෙන ගැසට් නිවේදනය බල රහිත කිරීමේ ආඥාවක් නිකුත් කරන ලෙස ඉල්ලා වැවිලි සමාගම් විසින් ගොනු කර තිබූ පෙත්සම නොවැම්බර් මස 08 වනදා විභාගය සඳහා කැඳවන ලෙස අභියාචනාධිකරණය අද (26) නියෝග කළා.
ආගරපතන වැවිලි සමාගම ඇතුළු වැවිලි සමාගම් 21 ක් විසින් මෙම පෙත්සම ගොනු කර තිබුණා.
මෙම පෙත්සම අද අභියාචනාධිකරණ විනිසුරු සෝභිත රාජකාරණා මහතා ඉදිරියේ කැඳවනු ලැබුවා.
එහිදී නඩුවට අදාළ විරෝධතා ගොනුකර තිබෙන බව පාර්ශ්වකරුවන් විසින් අධිකරණයට දැනුම් දුන්නා.
ඉන් අනතුරුව පෙත්සම නොවැම්බර් මස 8 වනදා විභාගයට ගන්නා බවට දැනුම්දෙමින් විනිසුරු මඩුල්ල විසින් දින නියම කළා.
වතු කම්කරු වැටුප් වැඩි කරමින් කම්කරු අමාත්‍යවරයා විසින් නිකුත් කරනු ලැබූ ගැසට් නිවේදනය සම්පූර්ණයෙන්ම නීතියට පටහැනි බව පෙත්සම්කාර වැවිලි සමාගම් කියා සිටියා.
තමන්ගෙන් කිසිදු කරුණු විමසීමකින් තොරව සිදු කරනු ලැබූ මෙම තීරණය නීතියට පටහැනි බවත් එබැවින් අදාළ ගැසට් නිවේදනය බල රහිත කිරීමේ ආඥාවක් නිකුත් කරන ලෙසත් එම වැවිලි සමාගම් අභියාචනාධිකරණයෙන් වැඩිදුරටත් ඉල්ලා තිබෙනවා.
