බිත්තර මිල ළඟදීම පහළට

අප්‍රේල් මාසය තුළ දේශීය බිත්තරයක මිල රුපියල් 35ක් දක්වා පහළ යාමට නියමිත බව කෘෂිකර්ම හා වැවිලි කර්මාන්ත අමාත්‍ය මහින්ද අමරවීර පවසනවා.

මේ වනවිට දේශීය වෙළඳපොළේ කුකුළු බිත්තරයක මිල රුපියල් 42- 48 දක්වා මිල ගණන යටතේයි අලෙවි කරෙන්නේ.

සිංහල හා දෙමළ අලුත් අවුරුදු උත්සව සමයේ දී දේශීය කුකුළු බිත්තරයක මිල රුපියල් 100 දක්වා ඉහළ යනු ඇති බවට ඇතැම් පුද්ගලයින් විවිධ ප්‍රකාශ මාධ්‍යට නිකුත් කරනු ලැබුවත් සිය අමාත්‍යාංශය විසින් ගත් දීර්ඝකාලීන ප්‍රතිපත්තිමය තීන්දු තීරණ හේතුවෙන් මේ වනවිට දේශීය බිත්තර නිෂ්පාදනය සමස්ත දෛනික අවශ්‍යතාවය ඉක්මවා ගොස් ඇති බවයි අමාත්‍යවරයා ප්‍රකාශ කළේ.

සාමාන්‍යයෙන් මෙරට දෛනික බිත්තර අවශ්‍යතාවය බිත්තර ලක්ෂ 65ක් බවත් මේ වන විටත් දේශීය කුකුළු ගොවිපොලවල බිත්තර නිෂ්පාදනය ලක්ෂ 75 සීමාව ඉක්මවා ගොස් ඇති බවත් බිත්තර නිෂ්පාදන කර්මාන්ත කරුවන්ගේ සංගමය කියා සිටියා.

එමනිසා ඉදිරි කාලය තුළ දේශීය කුකුළු බිත්තරයක මිල රුපියල් 35ටත් වඩා අඩු වීමට ඉඩ ඇති බවයි කෘෂිකර්ම හා වැවිලි කර්මාන්ත අමාත්‍ය මහින්ද අමරවීර පැවසුවේ.