වාරි මාර්ග දෙපාර්තමේන්තුව විසින් නඩත්තු කරනු ලබන ප්රධාන ජලාශවල සමස්ත ජල ධාරිතාව 77%ක මට්ටමක පවතින බව වාරිමාර්ග අධ්යක්ෂ ඉංජිනේරු එස්.පී.සී. සුගීෂ්වර පවසනවා.
එමෙන්ම මහවැලි ජලාශවල සමස්ත ජල ධාරිතාව 85% ඉක්ම වූ මට්ටමක පවතින අතර, විදුලිබල මණ්ඩලය මඟින් නඩත්තු කරනු ලබන ජලාශවල ජල මට්ටම ද ඉහළ අගයක පවතින බවයි ඔහු සඳහන් කළේ.
මේ අතර අනුරාධපුර කලාවැව ජලාශය මේ වනවිට තත්ත්පරයකට ඝන අඩි 12,000 ඉක්ම වූ ධාරිතාවයකින් ජලය මුදාහරින අතර, මේ හේතුවෙන් පහළ කලා ඔයේ ජල මට්ටම සැලකිය යුතු ලෙස ඉහළ ගොස් තිබෙනවා.
එමෙන්ම ඉදිරි කාලය තුළ ලැබෙන වර්ෂාපතනය මත මෙම තත්ත්වය ඉහළ යා හැකි බව සඳහන් කළ ඉංජිනේරු එස්.පී.සී. සුගීෂ්වර, කලා ඔයේ දෙපස සිටින ජනතාවට සහ රියදුරන් සැළකිල්ලෙන් පසුවන බවයි දැනුම් දෙන්නේ.
රාජාංගනය ජලාශයේ ද වාන් දොරටු 14ක් මේ වනවිට විවෘත කර ඇති අතර, ඉන් තත්ත්පරයකට ඝන අඩි 15,000 ඉක්ම වූ ජලධරිතාවක් කලා ඔයට මුදාහරින බවයි ඔහු සඳහන් කළේ.
මේ හේතුවෙන් රාජාංගනය ජලාශයෙන් පහළ කලා ඔය දෙපස ජීවත්වන ජනතාවට ද සැලකිලිමත්ව පසුවන ලෙසට දැනුම් දෙනවා.
එමෙන්ම අංගමුව ජලාශයෙන් ද තත්ත්පරයකට ඝන අඩි 1,900ක පමණ ජල ධාරිතාවක් කලා ඔයට මුදාහරින බවයි වාර්තා වන්නේ.
මේ අතර පුත්තලම දිස්ත්රික්කයේ ඉඟිනිමිටිය ජලාශයෙන් ද තත්ත්පරයට ඝන අඩි 4,000ක ජල ධාරිතාවක් මී ඔයට මුදාහරින අතර, තබ්බෝව ජලාශයෙන් තත්ත්පරයට ඝන අඩි 6,000ක ජල ධාරිතාවක් ජලය මුදාහරින බවයි ඉංජිනේරුවරයා පැවසුවේ.
ඒ අනුව මී ඔය දෙපස ජීවත්වන ජනතාවට ද බලපෑමක් එල්ල විය හැකි බවයි ඔහු වැඩිදුරටත් සඳහන් කර සිටියේ.
එමෙන්ම දිවයිනේ තවත් ප්රදේශ රැසක ඇති ජලාශ ගණනාවක් වාන් දමමින් පවතින බවත්, ඉදිරියේ දී ඇතිවන වර්ෂාව සමඟ ජලාශවල පිටවන් දැමීමේ සීඝ්රතාව වෙනස්විය හැකි බවයි ඔහු දැනුම් දුන්නේ.
