වැල්ලම්පිටිය, සිංහපුර ප්‍රදේශයේ අද අලුයම සිදු කළ ඒකාබද්ධ මෙහෙයුමකදී මත්ද්‍රව්‍ය සහ ආයුධ සන්තකයේ තබාගෙන සිටි කාන්තාවන් හතර දෙනෙකු ඇතුළු පුද්ගලයින් 40කට අධික පිරිසක් අත්අඩංගුවට ගෙන තිබෙනවා.
මෙහෙයුමට පොලිස් විශේෂ කාර්ය බළකාය (STF) සහ ශ්‍රී ලංකා යුද හමුදාව සම්බන්ධ වූ බවයි පොලිසිය සඳහන් කළේ.
සංවිධානාත්මක අපරාධ කල්ලි සාමාජිකයන් සිටීම, අපරාධ වැඩි වීම සහ මත්ද්‍රව්‍ය වැනි කරුණු හේතුවෙන් මෙම මෙහෙයුම ක්‍රියාත්මක කර තිබෙනවා.
බස්නාහිර පළාත භාර ජ්‍යේෂ්ඨ නියෝජ්‍ය පොලිස්පති දේශබන්දු තෙන්නකෝන්, බස්නාහිර දකුණ භාර නියෝජ්‍ය පොලිස්පති ගයංග මාරපන, බස්නාහිර දකුණ අපරාධ කොට්ඨාස අධ්‍යක්ෂ, පොලිස් අධිකාරී ලලිත් අබේසේකර යන නිලධාරීන් ගේ උපදෙස් මතයි මෙහෙයුම ක්‍රියාත්මක කර ඇත්තේ.
මෙම එම සැකකරුවන් සමග කඩු 4ක්, මන්නා පිහි 6ක්, හෙරොයින් මිලිගෑම් 6160ක්, ගංජා ග්‍රෑම් 4ක්, මත්ද්‍රව්‍ය ජාවාරමෙන් උපයා ගත් රුපියල් 17540ක මුදලක්, නීති විරෝධී මත්පැන් මිලිලිටර් 7000ක් සහ ත්‍රී රෝද රථයක් පොලිස් භාරයට ගෙන තිබෙනවා.
අත්අඩංගුවට ගත් සැකකරුවන් අතර අතර කිසිදු හේතුවක් නොමැතිව සිංහපුර ප්‍රදේශයට පැමිණ සිටි පුද්ගලයන් ද වන බව සඳහන්.
අලුයම 3 සිට අලුයම 6 දක්වා සිදුකළ මෙහෙයුමට අතුරුගිරිය, මීගොඩ සහ කඩුවෙල පොලිස් ස්ථානවල නිලධාරීන් 138 දෙනෙකු, යුද හමුදා නිලධාරීන් 200ක් මෙන්ම පොලිස් විශේෂ කාර්ය බළකා නිලධාරීන් 18ක් සහභාගි වී තිබෙනවා.
මෙම විශේෂ මෙහෙයුමේ තොරතුරු සැකකරුවන් වෙත නො යාම සඳහා ඉතා රහසිගත ලෙස පෙර සූදානම් කටයුතු මිරිහාන පොලිස් ක්‍රීඩාංගණයේදී සිදු කිරීම විශේෂත්වයක්.
