උඩින් – දියෙන් හා බිමෙන් ඊශ්‍රායලය ප්‍රහාරයකට සූදානමින්

ඊශ්‍රායලය පලස්තීනයේ හමාස් ත්‍රස්ත සංවිධානයට එරෙහි ව ඉතා ඉක්මනින් ම ප්‍රහාරයක් එල්ල කිරීමට සූදානමින් සිටින බව එරට ආරක්ෂක අංශය පවසනවා.

මේ වනවිටත් ඊශ්‍රායලයේ ත්‍රිවිධ හමුදාවන් එක් ව ගුවනින්, මුහුදෙන් මෙන් ම ගොඩබිමෙන් ගාසා තීරයට ප්‍රහාරයක් එල්ල කිරීමට මාන බලමින් සිටින බවටයි වාර්තා වන්නේ.

ඒ සඳහා ඊශ්‍රායලයේ ගුවන් හමුදාවේ ජ්‍යේෂ්ඨ අණදෙන නිලධාරින් ප්‍රහාරයට පසුබිම් සැකසීමට මේ වනවිටත් ගාසා තීරයට ඉහළ අහසේ ගුවන් පියාසැරි කරන බවටත් විදෙස් මාධ්‍ය වාර්තා කරනවා.

The Times of Israel වාර්තා කරන පරිදි භූමි ප්‍රහාර එල්ල කරන විට ඊශ්‍රායල හමුදාවට ගොඩබිම් මගින් ඉදිරියට යාම සඳහා අවශ්‍ය කරන පසුබිම මේ වනවිට ගුවන් හමුදාව මගින් සකස් කරන බවයි.

තමන් හමාස් සංවිධානයේ ජ්‍යෙෂ්ඨ අණදෙන නිලධාරියෙකුට පහර දී මරා දැමූ බවත් ඊශ්‍රායලයේ ආරක්ෂක අංශ ප්‍රධානියා පවසා තිබෙනවා.

රියර් අද්මිරාල් ඩැනියෙල් හගාරි කියා සිටියේ හමාස් සංවිධානය මිනිසුන් ඉවත්ව යාම වැළැක්වීමට උත්සාහ කළ ද ගාසා නගරයේ සිට 600,000කට අධික පලස්තීනුවන් දකුණෙන් ඉවත් වී ඇති බවටයි.

ඊශ්‍රායල ආරක්ෂක හමුදා ප්‍රකාශක ලුතිනන් කර්නල් පීටර් ලර්නර් පවසන්නේ සිය හමුදාව හමාස් සංවිධානයේ හැකියාවන් විනාශ කිරීමට හැකි උපරිමය සිදු කරන බවටයි.