ආගම්වලට අපහාස කිරීමේ සිද්ධියක් සම්බන්ධයෙන් තමන්ව අත් අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා දේවගැති ජෙරොම් ප්‍රනාන්දු විසින් ඉදිරිපත් කළ දෙවන රිට් පෙත්සම විභාගයකින් තොරව නිෂ්ප්‍රභ කරන ලෙස නීතිපතිවරයා සහ අගතියට පත් පාර්ශ්වය වෙනුවෙන් පෙනී සිටි නීතිඥවරු අද අභියාචනාධිකරණයෙන් ඉල්ලා සිටියා.
මෙම පෙත්සම අද අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ ඒ. මරික්කාර් යන මහත්වරුන්ගෙන් සමන්විත විනිසුරු මඩුල්ල ඉදිරියේ යි කැඳවනු ලැබුවේ.
එහිදී නීතිපතිවරයා වෙනුවෙන් පෙනී සිටි ජ්‍යෙෂ්ඨ රජයේ නීතිඥ ෂමින්ද වික්‍රම සහ පූජ්‍ය ඇල්ලේ ගුණවංශ ඇතුළු පිරිසක් වෙනුවෙන් පෙනී සිටී ජනාධිපති නීතිඥ සංජීව ජයවර්ධන මහතා විසින් මෙම විරෝධතා මතු කරනු ලැබුවා.
ජනාධිපති නීතිඥ සංජීව ජයවර්ධන මහතා අධිකරණය හමුවේ කියා සිටියේ තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා මෙම පෙත්සම්කරු ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් දැනටමත් ගොනු කර ඇති අතර එය ලබන 28 වනදා කැඳවීමට නියමිතව ඇති බවයි.
එසේම තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙසට ඉල්ලා මෙම පෙත්සම්කරු මීට පෙර ද රිට් පෙත්සමක් ඉදිරිපත් කළ අතර එය ඔහු විසින්ම ඉල්ලා අස් කරගනු ලැබු බවත් ජනාධිපති නීතිඥවරයා සිහිපත් කළා.
එසේ තිබියදී පෙත්සම්කරු ලොව පුරා සංචාරය කරමින් ලන්ඩනයේ රැඳී සිට මෙරට අධිකරණය බලය අභියෝගයට ලක් කරමින් මේ ආකාරයෙන් පෙත්සම් ඉදිරිපත් කොට විමර්ශන කටයුතුවලට බාධා සිදු කරමින් සිටින බවත් ජනාධිපති නීතිඥ සංජීව ජයවර්ධන මහතා අධිකරණය හමුවේ චෝදනා කර තිබෙනවා.
නීතිපතිවරයා වෙනුවෙන් පෙනී සිටි ජ්‍යෙෂ්ඨ රජයේ නීතිඥ ශමින්ද වික්‍රම මහතා ද කියා සිටියේ මෙම පෙත්සම නීතියට පටහැනි ආකාරයෙන් ගොනුකර තිබෙන හෙයින් එය වහාම නිෂ්ප්‍රභ කළ යුතු බවයි.
මෙම පෙත්සම සලකා බැලීම සඳහා කෙටි දිනයක් ලබා දෙන ලෙස පෙත්සම්කාර ජෙරොම් ප්‍රනාන්දු වෙනුවෙන් පෙනී සිටි ජනාධිපති නීතිඥ ජගත් වික්‍රමනායක නායක මහතා අධිකරණය හමුවේ කරුණු දක්වමින් ඉල්ලා සිටියා.
එම නඩුවට අදාළ විරෝධතා තිබේනම් ඒවා ජුලි මස 31 වන දාට පෙර ගොනුකරන ලෙස වගඋත්තරකරුවන්ට නියෝග කළ අභියාචනාධිකරණ විනිසුරු මඩුල්ල පෙත්සම සලකා බැලීම සඳහා අගෝස්තු මස 31 වනදා කැඳවන ලෙසත් නියෝග කළා.
