විපක්ෂ නායක සජිත් ප්රේමදාස මහතාගේ බිරිඳ වන ජලනි ප්රේමදාස ගෞරව නාමයකින් පිදුම් ලබා තිබෙනවා.
මෙරට සම්බුද්ධ ශාසනය වෙනුවෙන් ඇය සිදු කළ මෙහෙවර අගයමින් ත්රෛනිකායික මහාසංඝරත්නය විසිනුයි අද ජලනි ප්රේමදාස වෙත ‘ශ්රී සුගත ශාසන ප්රසාදිනී’ ගෞරව නාමය පිරිනමා ඇත්තේ.
ඊට අදාළ උත්සවය අද පැවැත්වුණේ දියතලාව කහගොල්ල ශ්රී සුදර්ශනාරාම විහාරස්ථානයේ දී යි.
සම්බුද්ධ ශාසනයේ චිරස්ථිතිය සහ උන්නතිය උදෙසා සිදුකරනු ලබන උදාරතර මෙහෙවර ඇගයීමට ලක් කරමින් ‘ශ්රී සුගත සාසන ප්රසාදිනී’ සම්මානය ඇයට මෙලෙස ප්රදානය කෙරුණා.
මෙම අවස්ථාවට එක්වෙමින් විපක්ෂ නායකවරයා කියාසිටියේ හෘද සාක්ෂියට එකඟව, ප්රායෝගිකවම ශ්රී සම්බුද්ධ ශාසනය සුරක්ෂිත කිරීම වෙනුවෙන් කැපවන බෞද්ධයින් ඉලක්ක කර ඔවුන්ගේ සාමාජයීය සහ ශාසනික මෙහෙවර අඩපණ කිරීමට කිසියම් කුමන්ත්රණයක් සිදු වෙමින් පවතින බවයි.
බෞද්ධ විරෝධී බලවේග හිස ඔසවන විට ඒවා සමනය කිරීමට නොහැකිනම්, එය බරපතළ ඛේදවාචකයක් බව ද ඔහු මෙහිදී සඳහන් කළා.
බුදු දහම සුරක්ෂිත කිරීමට කැපවීම සියලු දෙනාගේ වගකීමක් බව ද විපක්ෂ නායකවරයා අවධාරණය කර තිබෙනවා.
පවුල් දේශපාලනයට තමන් විරුද්ධ වුව ද ඔවුන්ට සමාජ සේවය කිරීමේ අයිතියට බාධා කිරීමට තමන් කිසිවිටකත් සූදානම් නැති බව ඔහු ප්රකාශ කළා.
ජේ.ආර්. ජයවර්ධන මහතාගේ සමයේ ක්රියාත්මක වූ සේවා වනිතා ඒකකයෙන් සිදුකළ සාමාජීය මෙහෙවර පිළිබඳවද ත් පැවසූ විපක්ෂ නායකවරයා මෙහිදී සිහිපත් කළා.
දේශපාලනඥයන්ගේ බිරින්දෑවරු එම වැඩසටහන හරහා සමාජ සේවාවන් රැසක් ඉටු කළ බවත්, ජේ.ආර්. ජයවර්ධන ජනාධිපතිතුමාගේ බිරිඳ පවා එම වැඩසටහනේ ප්රමුඛ කාර්යභාරයක් ඉටු කළ බවත් පෙන්වා දුන්නා.
සාමාජීය සහ ශාසනික සේවාවන් සිදු කිරීම යනු මැතිවරණයට ඉදිරිපත් වීම හෝ මන්ත්රී ධුර ලබාගැනීම හෝ නොවන බව පැවසූ විපක්ෂ නායකවරයා, ඔවුන්ට එවන් සේවාවන් කිරීමට ඇති අයිතියට බාධා කළ නොහැකි බවයි අවධාරණය කළේ.
ත්රෛනිකායික මහා සංඝරත්නයේ ආශිර්වාදයෙන් ජලනි ප්රේමදාස මහත්මිය වෙත “ශ්රී සුගත ශාසන ප්රසාදනී” ගෞරව නාමය පිරිනැමීම සහ නයන වාසල තිලක මහතාට දියතලාව කහගොල්ල ශ්රී සුදර්ශනාරාම පුරාණ විහාරස්ථානයේ බස්නායක නිලමේ තනතුර පිරිනැමීම ද මෙහිදී සිදු කෙරුණා.
