කොරියානු නැව් ඉදිකිරීම් රැකියා සඳහා ශ්‍රී ලංකික පුහුණු ශ්‍රමිකයින් යොමු කිරීම ඉලක්ක කර ගනිමින් පුහුණු මධ්‍යස්ථානයක් ආරම්භ කිරීම සඳහා අවබෝධතා ගිවිසුමක් අත්සන් කර තිබෙනවා.
ඒ ශ්‍රී ලංකා විදේශ සේවා නියුක්ති කාර්යාංශය, ගංගාරාම විහාරස්ථානයට අනුබද්ධිත ශ්‍රී ජිනරතන අධ්‍යාපන ආයතනය සහ කොරියානු ක්ලූලයිෆ් ආයතන අතරයි.
මෙම අවබෝධතා ගිවිසුම අත්සන් කිරීම සිදු කෙරුණේ විදේශ රැකියා අමාත්‍ය මනුෂ නානායක්කාරගේ ප්‍රධානත්වයෙන්.
ශ්‍රී ලංකා විදේශ සේවා නියුක්ති කාර්යාංශය වෙනුවෙන් එහි සභාපති හිල්මි අසීස්, ශ්‍රී ජිනරතන අධ්‍යාපන ආයතනය වෙනුවෙන් එහි පාලක සභාවේ ලේකම් ප්‍රසාද් ජයවීර, කොරියානු ක්ලූලයිෆ් ආයතනයේ ප්‍රධාන විධායක නිලධාරී ජොන් යුං ලිම් යන මහත්වරු මෙම ගිවිසුමට අත්සන් තබා තිබෙනවා.
මෙම අවබෝධතා ගිවිසුම අනුව කොරියානු නැව් ඉදිකිරීම් ක්ෂේත්‍රයේ රැකියා සඳහා වන ශ්‍රමිකයින් පුහුණු කිරීමට නියමිතයි.
නැව් ඉදිකිරීම් ක්ෂේත්‍රයේ වෙල්ඩින් රැකියා සඳහා මූලික අදියරේදී ශ්‍රමිකයින් පුහුණු කිරීමට නියමිත අතර දෙවැනි අදියරේදි නැව් පින්තාරු පුහුණුව සහ ඉලෙට්‍රිකල් පුහුණුව ලබාදීමටයි සැලසුම් කර ඇත්තේ.
නැව් ඉදිකිරීම් ක්ෂේත්‍රයේ රැකියා සඳහා පුහුණුව ලබන සියලුම පුහුණුකරුවන්ට කොරියානු භාෂා පුහුණුව ලබාදීම ද මෙහිදී සිදු කෙරෙනවා.
ගංගාරාම විහාරස්ථානයට අනුබද්ධිත ශ්‍රී ජිනරතන අධ්‍යාපන ආයතනය පුහුණුව සඳහා අවශ්‍ය පහසුකම් සපයන අතර කොරියානු ක්ලූලයිෆ් ආයතනය විසිනුයි පුහුණු කිරීම් කටයුතු සිදු කරනු ලබන්නේ.
ඒ සඳහා වන කොරියානු පුහුණුකරුවන් ද එම ආයනය විසින් සම්බන්ධීකරණය කිරීමට නියමිතයි.
පුහුණුව ලබන සියලුම පුහුණුකරුවන් කොරියානු නැව් ඉදිකිරීම් ක්ෂේත්‍රෙය් රැකියා සඳහා යොමු කිරීමට අවශ්‍ය සම්බන්ධීකරණ කටයුතු සහ රැකියා කෝටාවන් ලාංකික ශ්‍රමිකයින්ට ලබාදීමට සැලසුම් සකස් කර තිබෙනවා.
විදේශ සේවා නියුක්ති කාර්යාංශය විසින් අදාළ පුහුණු කටයුතුවල ගුණාත්මකභාවය සහතික කිරීම සඳහා වන අධීක්ෂණ කටයුතු සිදු කරනු ඇති.
wpDiscuz
