තලාව, නබඩවැව, ඉඳිගස්පොතාන රක්ෂිතයේ තිබී අභිරහස් ලෙස මියගිය පුද්ගලයෙකුගේ මළ සිරුරක් සොයාගෙන තිබෙනවා.
මෙලෙස සොයාගත් මළ සිරුර තලාව, කරගහවැව ප්රදේශයේ පදිංචිව සිටි ආනන් දිසානායක නම් 56 හැවිරිදි දෙදරු පියෙකුගේ බවයි පොලිසිය සඳහන් කළේ.
මෙම පුද්ගලයා කරගහවැව සහ ඉදිගස්පොතාන ප්රදේශයේ මහා පරිමාණයෙන් වගා කටයුතු සිදුකරමින් සේවකයින් යොදවා ගොවිපළ පවත්වාගෙන යන පුද්ගලයකු බවයි පොලිසිය පැවසුවේ.
එම පුද්ගලයා ඊයේ (06) දහවල් ඉදිගස්පොතාන රක්ෂිතය ආසන්නයේ පිහිටි තම හේනේ සිට දිවා ආහාරය රැගෙන ඒමට පිටවගොස් නැවත හේනට නොපැමිණි බවට සේවකයින් කළ දැනුම්දීම මත මරණකරුගේ ඥාතීන් විසින් ඒ පිළිබඳ සොයා බලා තිබෙනවා.
එහිදී මියගිය පුද්ගලයා ගමන් කළ යතුරුපැදිය, ඉදිගස්පොතාන රක්ෂිතය ආසන්නයේම පිහිටි නිවසක ගෙවත්තේ නවතා තිබියදී සොයා ගෙන ඇති බවයි වාර්තා වුණේ.
එම නිවසේ හිමිකරු කියා සිටියේ තමන් ගවයින් බැඳීමට ගොස් සිටි බැවින් යතුරුපැදිය ගෙවත්තේ නවතා යනු තමන් නොදුටු බවයි.
ඒ, අනුව මරණකරුගේ පුත්රයා විසින් ඊයේ (06) සවස තම පියා පිළිබඳ තොරතුරක් නොමැති බවට තලාව පොලීසියට පැමිණිල්ලක් සිදුකර තිබෙනවා.
තලාව පොලීසිය හා ප්රදේශවාසීන් එක්ව තලාව, නබඩවැව, ඉඳිගස්පොතාන රක්ෂිතයේ මෙම පුද්ගලයා සොයා මෙහෙයුම් ආරම්භ කර ඇති අතර, ඒ අනුව අද (07) උදෑසන ප්රධාන මාර්ගයේ සිට කිලෝමීටරයකට ආසන්න දුරක් රක්ෂිතය තුළට වන්නට තිබී ඔහුගේ සිරුර සොයා ගැනීමට හැකිව තිබෙනවා.
මළ සිරුර අසල ඔහුගේ ජංගම දුරකථනය හා යතුරුපැදියේ යතුර ද තිබූ බවත්, ඔහුට වමනය වී තිබෙනු දැකගත හැකි වූ බවත් පොලීසිය පවසනවා.
පවුලේ ඥාතීන් පවසන්නේ, ඔහුට පෞද්ගලික තරහාකරුවකු නොසිටි බවත්, යතුරුපැදිය නවතා රක්ෂිතය තුළ කිලෝමීටරයකට ආසන්න දුරක් පා ගමනින් යාමට හේතුවක් ඔහුට නොමැති බැවින් මෙම මරණය සැක සහිත බවයි පවුලේ ඥාතීන් පවසන්නේ.
මෙම මරණයට හේතුව ඝාතනයක්ද, නැතහොත් වෙනත් කාරණාවක් ද යන්න සම්බන්ධයෙන් පරීක්ෂණ සිදුකරන බව තලාව පොලීසිය වැඩිදුරටත් සඳහන් කර සිටියා.
