කුරුණෑගල ප්‍රධාන මහේස්ත්‍රාත්වරයා ගමන්ගත් මෝටර් රථයට අයුතු අවහිරයක් සිදු කර සාපරාධී බලහත්කාරය පා බැණ වැදී සාපරාධී බිය ගැන්වීමේ චෝදනා මත රක්ෂිත බන්ධනාගාර ගත කර සිටි සැකකරුවන් තිදෙනකු දැඩි කොන්දේසි සහිත ඇප මත මුදා හැර තිබෙනවා.
මිනුවන්ගොඩ වැඩ බලන මහේස්ත්‍රාත් මංගල වර්ණකුලසූරිය මහතායි අද (12) පස්වරුවේ මෙම නියෝගය ලබාදුන්නේ.
එක් සැකකරුවෙකුට රුපියල් ලක්ෂය බැගින් වූ ශරීර ඇප 2ක් මෙලෙස නිදහස් කෙරුණේ බැලුම්මහර සහ දංකොටුව යන ප්‍රදේශවල පදිංචිකරුවන් දෙදෙනෙක්.
සෑම මසකම අවසාන ඉරුදින පෙරවරු 9ත් 12ත් අතර මිනුවන්ගොඩ පොලිසියේ පෙනී සිටින ලෙසට ද ඇප නියම වූ සැකකරුවන් තුන් දෙනාට නියෝග කෙරුණා.
කුරුණෑගල ප්‍රධාන මහේස්ත්‍රාත් එන්.ඩී. බංදුල ගුණරත්න මහතා මිනුවන්ගොඩ පොලිසියට කරන ලද පැමිණිල්ලක් මත සිදු කල පරීක්ෂණවලට අනුවයි සැකකරුවන් තිදෙනා සමග අයුතු අවහිරය සිදු කිරීම සඳහා යොදාගත් මෝටර් රථය අත්අඩංගුවට ගෙන ඇත්තේ.
මහේස්ත්‍රාත්වරයා ගමන් ගත් මෝටර් රථය කටුනායක ගුවන්තොටුපොලේ සිට මිනුවන්ගොඩ දෙසට ගමන් කරමින් තිබිය දී එම රථයට විවිධ ආකාරයෙන් බාධා කරමින් සැකකරුවන් ගමන් ගත් මෝටර් රථය ධාවනය කර ඇති බව පොලිසිය අධිකරණයට දැනුම් දෙනු ලැබුවා.
සැකකරුවන් ගමන් ගත් වාහනයේ ලියාපදිංචි අංකය ඔස්සේ පරීක්ෂණ සිදු කර සැකකරුවන් තිදෙනා සමග එම මෝටර් රථය අත්අඩංගුවට ගත් බවයි පොලිසිය අධිකරණය හමුවේ වැඩිදුරටත් සඳහන් කළේ.
