වන්දනාකරුවන්ගේ ජීවිත තුනක් බිළිගත් හුළං වංගුවට අරුම පුදුම දඬු වැටක් (ඡායාරූප)

පසුගිය 19 වනදා ශ්‍රී පාද වන්දනාකරුවන් පිරිසක් රැගත් බස් රථයක් අනතුරට පත් නෝටන්බ්‍රිජ් – දියගල ප්‍රධාන මාර්ගයේ හුළං වංගුව ස්ථානයේ තාවකාලික ආරක්‍ෂිත වැටක් ඉදි කිරීමට මාර්ග සංවර්ධන අධිකාරිය කටයුතු කර තිබෙනවා.

මාර්ගයේ ගමන් ගන්නා වාහන ප්‍රපාතයට පෙරළීම වැලැක්වීමේ අරමුණින් ඉදිකර ඇති මෙම ආරක්‍ෂිත වැට, ලී දඬු යොදාගෙන ඉදිකර තිබීම විමතියට කරුණක්.

මාර්ග සංවර්ධන අධිකාරි කාර්යාලය විසින් ඊයේ (27) දිනයේ දී මෙම තාවකාලික ආරක්‍ෂිත දඬු වැට ඉදිකර ඇති බවයි අප වාර්තාකරු සඳහන් කළේ.

ඉකුත් (19) දින ශ්‍රී පාද වන්දනාකරුවන් පිරිසක් රැගත් බස් රථයක් මෙම ස්ථානයෙන් ප්‍රපාතයට පෙරළී සිදු වූ අනතුරෙන් තිදෙනෙකු ජීවිතක්ෂයට පත් වූ අතර තවත් 26 දෙනෙකු තුවාල ලබා රෝහල් ගත කෙරුණා.

හැටන් මාර්ගය ඔස්සේ ශ්‍රි පාද වන්දනාවේ පැමිණෙන වන්දනාකරුවන් රැගත් බස් රථ සහ සෙසු වාහන නල්ලතන්නියට පිවිසීමට ඇති කෙටි මාර්ගයක් වශයෙන් නෝටන්බ්‍රිජ් – දියගල ප්‍රධාන මාර්ගය බහුලව භාවිත කරනවා.

මෙම මාර්ගය කිලෝමිටර් 08ක දුරකින් කින් සමන්විත වන අත , එම මාර්ගය කාපට් අතුරා ප්‍රතිසංස්කරණය කිරීමේ කටයුතු 2020 වසරේ ආරම්භ කර තාවකාලිකව නතර කෙරුණා.

මාර්ගයේ සංවර්ධන කටයුතු තාවකාලිකව මේ වන විට නතර කර තිබීම හේතුවෙන් එම මාර්ගයේ ස්ථාන කිහිපයකම විශාල
වලවල් හෑරී මෙවැනි තවත් අනතුරු සිදුවීමේ දැඩි අවධානමක් පවතිනවා.

ඒ හේතුවෙන් එම මාර්ගයේ අතර මඟ නවතා දමා ඇති සංවර්ධන කටයුතු යළි ආරම්භකර කඩිනමින් අවසන්කර දෙන ලෙසයි ප්‍රදේශවාසීන් ඉල්ලා සිටින්නේ.