දංඕවිට ප්‍රදේශයේ දී මත්පැන් අලෙවිසැලක් කොල්ලකෑ සිද්ධියේ පොලිස් වෙඩි පහරට ලක්ව රාගම රෝහලේ ප්‍රථිකාර ලබමින් සිටි කොල්ලකරුවෙක් පසුගියදා (08) රාත්‍රියේ ජීවිතක්ෂයට පත්ව ඇති බව වාර්තා වනවා.
මෙලෙස මියගොස් ඇත්තේ වත්තල – අක්බාර් ටවුමේ පදිංචි 32 හැවිරිදි පුද්ගලයෙක් බවයි වාර්තා වන්නේ.
පසුගිය දෙවනදා අලුයම් කාලයේ දංඕවිට ප්‍රදේශයේ දී මත්පැන් අලෙවිසැලක් කොල්ලකන බවට ලද තොරතුරක් මත පොලිසිය එහි පැමිණි අවස්ථාවේ දෙපාර්ශ්වය අතර වෙඩි හුවමාරුවක් සිදුව තිබුණා.
එහිදී පොලිස් වෙඩි පහරට ලක්ව කොල්ලකරුවන් දෙදෙනෙක් තුවාල ලබා රාගම රෝහලට ඇතුළත්ව සිටිය දී පොලිසිය විසින් ඔවුන්ව අත්අඩංගුවට ගනු ලැබුවා.
පොලිස් අත්අඩංගුවට පත් එම කොල්ලකරුවන් දෙදෙනා, වැලිසර මහේස්ත්‍රාත්වරයා පැමිණ පරීක්ෂාකර බැලීමෙන් අනතුරුව ලබන 14 වනදා දක්වා රක්ෂිත බන්ධනාගාර ගත කිරීමටයි නියෝග කළේ.
එලෙස පොලිස් නිලධාරීන්ගේ ආරක්ෂාව යටතේ ප්‍රථිකාර ලබමින් සිටි සැකකරුවෙකුයි මෙලෙස ජීවිතක්ෂයට පත්ව ඇත්තේ.
වෙඩි වැදුණු අනෙක් කොල්ලකරු පොලිස් ආරක්ෂාව යටතේ රාගම රෝහලේ ප්‍රතිකාර ලබමින් සිටින බවයි වාර්තා වුණේ.
මෙම සිද්ධියෙන් බස් රථයක ගමන්කරමින් සිටි 29 හැවිරිදි ඉරේෂා ශ්‍යාමලී නමැති තරුණියකට ද වෙඩි උණ්ඩයක් වැදීමෙන් අවාසනාවන්ත ලෙස ජීවිතක්ෂයට පත් වුණා.
