ළදරුවන් දෙදෙනෙකු ඇතුළු පුද්ගලයින් 72 දෙනෙකුට මරු කැඳවූ නේපාලයේ ගුවන් අනතුරට හේතුව අනාවරණ වී තිබෙනවා.
නේපාල රජය විසින් පත් කරන ලද විමර්ශකයින්ගේ වාර්තාවක දැක්වෙන්නේ එහි නියමුවන් වැරදීමකින් යානයේ විදුලිය විසන්ධි කිරීමේ ප්‍රතිඵලයක් අනතුරට හේතුව විය හැකි බවයි.
Yeti Airlines ගුවන් යානය පසුගිය ජනවාරි 15 වනදා කත්මණ්ඩු අගනුවර සිට සංචාරක නගරයක් වන Pokhara වෙත පියාසර කරමින් තිබියදී අනතුරට ලක්වුණා.
එය වසර 30කට පසු නේපාලයේ සිදුවූ මාරාන්තික ගුවන් අනතුර ලෙසටයි සැලකෙන්නේ.
පුද්ගලික සමාගමක් සතු ගුවන් යානය ගුවන් තොටුපළේ සිට කිලෝමීටර් 1.5ක් (සැතපුම් 0.9ක්) දුරින් පිහිටි සෙටි ගං ඉවුරේ දී කඩා වැටුණු අතර, නේපාල සොල්දාදුවන් සිය ගණනක් සම්බන්ධ කර ගත් ගලවා ගැනීමේ මෙහෙයුමක් ද සිදු කෙරුණා.
එහි ගම්‍යතාවය හේතුවෙන්, යානය බිම වැදීමට පෙර තත්පර 49ක් දක්වා පියාසර කළ බවයි විමර්ශන මණ්ඩලයේ සාමාජිකයෙකු වන ගගනගාමී ඉංජිනේරු දීපක් ප්‍රසාද් රොයිටර් වෙත ප්‍රකාශ කළේ.
අදාළ තාක්ෂණික හා නිපුණතා පදනම් කරගත් පුහුණුවක් නොමැතිකම, අධික වැඩ බර සහ ආතතිය, සහ සම්මත මෙහෙයුම් ක්‍රියා පටිපාටිවලට අනුකූල නොවීම අනතුරට හේතු වන සාධක ලෙස ද වාර්තාව ලැයිස්තුගත කර තිබෙනවා.
යානය නිසි ලෙස නඩත්තු කර ඇති බවත්, දන්නා දෝෂයක් නොමැති බවත්, නියමු කුටියේ කාර්ය මණ්ඩලය නේපාල සිවිල් ගුවන් සේවා අධිකාරියේ නීති රීතිවලට අනුකූලව සුදුසුකම් ලබා ඇති බවත් එහි වැඩිදුරටත් සඳහන්.
එක්සත් ජනපදය, කැනඩාව, ප්‍රංශය සහ සිංගප්පූරුව යන රටවල විමර්ශකයින් විශාල පිරිසක් මෙම පරීක්ෂණයට සම්බන්ධ වී තිබුණා.
පසුගිය දශකය පුරාවට යුරෝපා සංගමය විසින් නේපාල ගුවන් සේවා සිය ගුවන් සීමාවෙන් තහනම් කර ඇත්තේ ආරක්‍ෂාව හේතුවෙන්.
නේපාලයේ ගුවන් අනතුරු අසාමාන්‍ය දෙයක් නොවන බවයි විදෙස් වාර්තා පෙන්වා දෙන්නේ.
බොහෝ විට එහි පවතින අසීරු ධාවන පථ සහ අනතුරුදායක තත්වයන් ඇති කළ හැකි හදිසි කාලගුණ වෙනස්වීම් ඊට හේතුවයි.
පසුගිය මැයි මාසයේදී Yeti Airlines සමාගමට අයත් Tara Air Flight 197 යානය ද කඳු බෑවුමකට කඩා වැටීමෙන් මගීන් සහ කාර්ය මණ්ඩලය 22 දෙනෙකු ජීවිතක්ෂයට පත් වුණා.
