වායු රයිෆලයකින් වෙඩි තබා පුද්ගලයෙකු ඝාතනය කිරීමේ සිද්ධියක් සම්බන්ධයෙන් සැකකරුවන් 08 දෙනෙකු අත්අඩංගුවට ගෙන ඇති බව වනාතවිල්ලුව පොලිසිය පවසනවා.
අද (09) අලුයම 1.30 ට පමණ වනාතවිල්ලුව, කරතිව් ප්රදේශයේ දී කජු ඉඩමක මෙම වෙඩි තැබීම සිදුව ඇති බවයි වාර්තා වුණේ.
වෙඩි වැදීමෙන් මිය ගොස් ඇත්තේ අතුකෝරලගේ ප්රදීප් සුසන්ත නැමැති වයස අවුරුදු 38ක පුද්ගලයෙක්.
හලාවත වැවිලි සමාගමට අයත් කරතිව් ප්රදේශයේ පිහිටි ඉඩමක් කජු අස්වැන්න නෙලා ගැනීම සදහා බදු පදනම මත කල්පිටිය ප්රදේශයේ පදිංචිකරුවෙකු විසින් ලබා ගෙන තිබෙනවා.
එම කජු වගාව ආරක්ෂා කිරීම සදහා බදුකරු විසින් මුරකරුවන් යොදා තිබී ඇති අතර, අද (09) අලුයම් කාලයේ එම කජු වගාවට හොර රහසේ ඇතුළු වූ අයෙකුට මුරකරුවෙකු විසින් වෙඩි තැබීම සිදුකර ඇති බවයි තොරතුරු වාර්තා වන්නේ.
වෙඩි වැදීමෙන් තුවාල ලබා සිටි එම පුද්ගලයා ප්රතිකාර සදහා පුත්තලම මූලික රෝහලට ඇතුළත් කිරීමෙන් අනතුරුව මියගොස් තිබෙනවා.
වනාතවිල්ලුව පොලිසිය සිද්ධිය පිළිබඳව වැඩිදුර විමර්ශණ සිදුකරනු ලබනවා.
