සීදුව – කොටුගොඩ ප්‍රදේශයේ මාර්ග බාධකයක දී පොලිස් නිලධාරියෙකුගේ ගිනි අවියක් ක්‍රියාත්මක වී පුද්ගලයෙක් ජීවිතක්ෂයට පත්ව තිබෙනවා.
අද අලුයම සිදු වූ මෙම සිද්ධියෙන් පොලිස් නිලධාරියෙක් ද තුවාල ලබා ඇති බවයි වාර්තා වුණේ.
පොලිස් නිලධාරීන් මෝටර් රථයක් පරීක්ෂා කිරීමට යාමේ දී, එහි සිටි පුද්ගලයෙක් විසින් නිලධාරියෙකුගේ ගිනි අවියක් උදුරාගැනීමට උත්සහා කිරීමේ දී එම අවිය ක්‍රියාත්මක වී මෙම අනතුර සිදුව ඇති බවයි පොලිසිය පැවසුවේ.
සීදුව – කොටුගොඩ ප්‍රදේශයේ පොලිස් මාර්ග බාධකයක අද අලුයම රාජකාරී කරමින් සිටි පොලිස් නිලධාරීන් පිරිසක් විසින් සැකකටයුතු අළු පැහැති මෝටර් රථයක් පරීක්ෂා කිරීමට කටයුතු කර තිබෙනවා.
එම අවස්ථාවේ දී මෝටර් රථයේ වම්පස සිටි පුද්ගලයෙක් පොලිස් සැරයන්වරයෙකුගේ ගිනි අවිය උදුරා ගැනීමට උත්සහා කර ඇති බවයි වාර්තා වන්නේ.
එහිදී එම ගිනි අවිය ක්‍රියාත්මක වී අදාළ පුද්ගලයාගේ උදරයට වෙඩි වැදී තිබෙනවා.
පොලිස් නිලධාරියාගේ එක් පදයකට ද වෙඩි වැදී ඇති බවයි වාර්තා වුණේ.
වෙඩි වැදීමෙන් තුවාල ලැබූ පොලිස් නිලධාරියා සහ අදාළ පුද්ගලයා මීගමුව රෝහලට ඇතුළත් කිරීමට කටයුතු කර ඇති අතර, එහිදී අදාළ පුද්ගලයා මියගොස් ඇති බවයි පොලිසිය සඳහන් කළේ.
මෙම සිද්ධිය සිදුවන අවස්ථාවේ දී මෝටර් රථය තුළ පුද්ගලයින් සිව්දෙනෙක් සිට ඇති අතර, සිද්ධියෙන් පසු අනෙක් තිදෙනා පළාගොස් ඇති බවයි වාර්තා වන්නේ.
මොවුන් බීමතින් සිට ඇති බවට ද කරුණු අනාවරණය වී තිබෙනවා.
වෙඩි වැදීමෙන් ජීවිතක්ෂයට පත්ව ඇත්තේ හෙට්ටියාවල කුඩාගමගේ ශානික දේශාන් නැමැති 39 හැවිරිදි, පූගොඩ – බංගලාවත්ත ප්‍රදේශයේ පදිංචි අයෙක්.
වෙඩි වැදීමෙන් තුවාල ලැබූ සීදුව පොලිස් ස්ථානයට අනුයුක්තව රාජකාරී සිදුකළ පොලිස් සැරයන්වරයා මීගමුව රෝහලේ ප්‍රතිකාර ලබන බවයි පොලිසිය සඳහන් කළේ.
