යතුරු පැදි දෙකක් සදහා මෝටර් රථ ප්‍රවාහන කොමසාරිස් කාර්යාලය මගින් එකම ලියා පදිංචි අංකය ඇතුළත් අංක තහඩු නිකුත් කිරීමේ සිද්දියක් සම්බන්ධයෙන් කැකිරාව පොලිසිය මගින් විමර්ශණ ආරම්භ කර තිබෙනවා.
එක් යතුරුපැදියක හිමිකරු විසින් පොලිසියට කරන ලද පැමිණිල්ලකට අනුව සිදුකරන ලද විමර්ශනයන්ට අදාළවයි කැකිරාව පොලිසිය එම යතුරුපැදි පොලිස් භාරයට ගෙන ඇත්තේ.
එම යතුරු පැදි එකම වර්ගයේ සහ එකම පැහැයෙන් යුක්ත අතර එකම ධාරිතාවයෙන් ද යුතු ඒවා වනවා.
එකම ලියාපදිංචි අංකය සහිත මෙම යතුරු පැදි දෙක සඳහා ඒවායේ හිමිකරුවන් විසින් වෙන වෙනම කල්බදු පහසුකම් ද ලබා ගෙන තිබීම ද විශේෂත්වයක්.
එම යතුරු පැදි දෙක සදහා අංක තහඩු නිකුත් කිරීමේදී එක් යතුරු පැදියකට පළාත් අක්ෂර සහිත අංක තහඩු ද අනෙක් යතුරු පැදිය සදහා දැනට නිකුත් කෙරෙන පළාත් අක්ෂර රහිත අංක තහඩු ද මෝටර් රථ ප්‍රවාහන කොමසාරිස් කාර්යාලය මගින් නිකුත් කර තිබෙනවා.
පළාත් අක්ෂර සහිත යතුරු පැදිය මැදවච්චිය ප්‍රදේශයේ පුද්ගලයකුට අයත් එකක්.
ඔහු පොලිසියට පවසා ඇත්තේ මීට වසර කිහිපයකට පෙර තමන් එම යතුරු පැදිය මිලදී ගත් අතර කිසිදු අවස්ථාවක තම යතුරු පැදිය වෙනත් අයෙකුට විකිණීමක් හෝ පැවැරීමක් ද සිදුකර නොමැති බවයි.
අනෙක් යතුරු පැදිය මඩාටුගම පුද්ගලයකුට අයත් වන අතර එය තැරුව්කරුවකු මගින් මිළදී ගත් බව හිමිකරු පොලිසියට පවසා තිබෙනවා.
අදාළ යතුරු පැදි දෙක සඳහා මෝටර් රථ ප්‍රවාහන කොමසාරිස් කාර්යාලයෙන් එකම ලියාපදිංචි අංක ඇතුළත් අංක තහඩු කට්ටල දෙකක් නිකුත් කර තිබීමත්, එකම යතුරු පැදියේ තොරතුරු ඇතුළත් ලියාදිංචි සහතික දෙකක් පුද්ගලයින් දෙදෙනකුට නිකුත් කර තිබීමත්, කිසියම් වංචාවක් විය හැකි බවටයි පොලිසිය සැක කරන්නේ.
ඒ අනුව අදාළ යතුරු පැදි දෙක සහ ඒවාට අදාළ ලිපි ලේඛන වැඩිදුර විමර්ශණ සඳහා කැකිරාව පොලිස් ස්ථානය භාරයට ගෙන තිබෙනවා.
එම යතුරු පැදි මෝටර් රථ ප්‍රවාහන කොමසාරිස් කාර්යාලයේ අනුරාධපුර මොටර් රථ පරීක්ෂකවරයාට ඉදිරිපත් කිරීමට ද පොලිසිය කටයුතු කර තිබුණා.
මෙතෙක් සිදු කර ඇති විමර්ශනවලින් හෙළිවී ඇති කරුණු අනුව බොහෝ විට මෙය කල්බදු සමාගම්, තැරැව්කරුවන් සහ මෝටර් රථ ප්‍රවාහන කොමසාරිස් කාර්යාලයේ ඇතැම් නිලධාරීන් සමග එක්ව සිදුකරනු ලබන කිසියම් ජාවාරමක් විය හැකි බවටයි පොලිසිය සැක කරන්නේ.
කැකිරාව පොලිස් ස්ථානය මගින් එම සිද්ධිය සම්බන්ධයෙන් වැඩිදුර විමර්ශණ ආරම්භ කර තිබෙනවා.
දැනට පොලිස් භාරයේ පවතින එම යතුරු පැදි කැකිරාව දිසා මහේස්ත්‍රාත් අධිකරණයට ඉදිරිපත් කිරීමට නියමිතයි.
