වොෂින්ටන්හි හිල්ටන් හෝටලයේ වෙඩික්කරුගේ ඉලක්කය ට්‍රම්ප් නෙවෙයි – වෙඩික්කරුගෙන් පාපොච්චාරණයක්

ඇමරිකානු ජනාධිපති ඩොනල්ඩ් ට්‍රම්ප්ට සම්බන්ධ නිලධාරීන් තම ඉලක්ක වූ බව වොෂින්ටන්හි හිල්ටන් හෝටලයේ වෙඩි තැබීම සිදුකළ වෙඩික්කරු පවසා තිබෙනවා.

වෙඩි තැබීම සම්බන්ධයෙන් විමර්ශන සිදුකරන නිලධාරීන් හමුවේ සැකකරු මේ බව පවසා ඇති බවයි විදෙස් මාධ්‍ය වාර්තා කරන්නේ.

මේ අතර සිද්ධිය අතරතුර අවම වශයෙන් වෙඩි තැබීම් පහක් හෝ අටක් සිදුව ඇති බවයි විදෙස් වාර්තා සඳහන් කරන්නේ.

වෙඩික්කරුව ආරක්ෂක අංශ නිලධාරීන් විසින් අල්ලා ගැනීමට සමත් වූ අතර, කෝල් තෝමස් ඇලන් නැමැති 31 හැවිරිදි සැකකරු රෝහල් ගතකර ඇති බවයි වාර්තා වන්නේ.

ඔහුට එරෙහිව හෙට දිනයේ විධිමත් ලෙස චෝදනා එල්ල කිරීමට නියමිත බවයි විදෙස් වාර්තා පවසන්නේ.

එක්සත් ජනපද ජනාධිපති ඩොනල්ඩ් ට්‍රම්ප් ඔහුගේ ආර්යාව, උප ජනාධිපති ජේ.ඩී. වෑන්ස් ඇතුළු රජයේ ජ්‍යෙෂ්ඨ නියෝජිතයින්ගේ සහභාගීත්වයෙන් ඊයේ (25) රාත්‍රී පැවති ධවල මන්දිර වාර්තාකරුවන්ගේ වාර්ෂික රාත්‍රී භෝජන සංග්‍රහය අතරතුර එම ස්ථානයට කඩා වැදුණු පුද්ගලයෙකු විසින් වෙඩි තැබීමක් සිදුකර තිබුණා.

එම අවස්ථාවේ කිසිවෙකුටවත් හානිය නොවූ අතර, ඩොනල්ඩ් ට්‍රම්ප් ජනාධිපතිවරයා ඇතුළු ප්‍රභූන් වහාම එම ස්ථානයෙන් ඉවත්කර ගැනීමට ආරක්ෂක අංශ කටයුතු කරනු ලැබුවා.

මේ අතර සිදුවූ මෙම අනපේක්ෂිත සිදුවීම ලෝක නායකයින් රැසක් හෙළාදැකින් ප්‍රතිචාර දක්වා තිබෙනවා.

කැනේඩියානු අගමැති මාර්ක් කාර්නි, ඕස්ට්‍රේලියානු අග්‍රාමාත්‍යවරයා වන ඇන්තනි ඇල්බනීස්, වැඩබලන වෙනිසියුලානු ජනාධිපති ඩෙල්සි රොඩ්‍රිගස්, පකිස්ථාන අගමැති ෂෙබාස් ෂරීෆ්, ඉන්දීය අගමැති නරේන්ද්‍ර මෝදි ඒ අතර වනවා.