විදේශගත වන ශ්‍රමිකයන්ගෙන් 56%කගේ අධ්‍යාපන මට්ටම අ.පො.ස. සාමාන්‍ය පෙළ දක්වා පමණක් බව මානව හිමිකම් හා ප්‍රජා සංවර්ධන මධ්‍යස්ථානයේ කුරුණෑගල ශාඛාව අනාවරණය කර තිබෙනවා.
මෙම තොරතුරු අනාවරණය වී ඇත්තේ සංක්‍රමණික සෞඛ්‍ය ප්‍රතිපත්තිය සහ සංක්‍රමණික සේවා ගිවිසුම් පිළිබඳ සිදු කරන ලද සමීක්ෂණයක් මගින්.
ඉහත කරුණු අනාවරණය වූයේ පාර්ලිමේන්තු මන්ත්‍රී වෛද්‍ය ගරු සුදර්ශනී ප්‍රනාන්දුපුල්ලේගේ සභාපතිත්වයෙන් පසුගියදා පැවති පාර්ලිමේන්තු මන්ත‍්‍රීවරියන්ගේ සංසද රැස්වීමේදීයි.
මැදපෙරදිග රටවලට සංක්‍රමණය වන සංක්‍රමණික ශ්‍රමිකයන්ගෙන් බහුතරයක් පුද්ගලික ආයතන හරහා විදෙස්ගත වන අතර, එහිදී ඔවුන්ගේ අධ්‍යාපන මට්ටම අ.පො.ස. සාමාන්‍ය පෙළ දක්වා පමණක් වුවද, ඔවුන්ගෙන් 52% ක ප්‍රතිශතයක් සංක්‍රමණ සේවා ගිවිසුම ඉංග්‍රීසි භාෂාවෙන් අත්සන් කරන අතර අනෙකුත් සංක්‍රමණික ශ්‍රමිකයන් එම ගිවිසුම් අරාබි භාෂාවෙන් අත්සන් කරන බවයි එහිදී අනාවරණය වී ඇත්තේ.
එබැවින්, විදේශ සංක්‍රමණික ශ්‍රමිකයෙකු එවැනි සංක්‍රමණික සේවා ගිවිසුමක් අත්සන් කරනුයේ ඒ පිළිබඳ නිසි අවබෝධයකින් ද යන්න පිළිබඳ කමිටුවේ අවධානය යොමු වී තිබෙනවා.
එමෙන්ම, සංක්‍රමණික ශ්‍රමිකයින්ගෙන් 60%ක් කුවේටයට සහ ඉතිරි පිරිස සෞදි අරාබිය සහ අනෙකුත් මැදපෙරදිග රටවලට සංක්‍රමණය වන අතර, රැකියා සඳහා සංක්‍රමණය වන පිරිසෙන් 70%ක්ම ගෘහ සේවිකාවන් බවයි මෙහිදී වැඩිදුරටත් හෙළිවී ඇත්තේ.
කාරක සභා සභාපති වෛද්‍ය සුදර්ශනී ප්‍රනාන්දුපුල්ලේ මහත්මිය පෙන්වා දුන්නේ විගමණික සෞඛ්‍ය ප්‍රතිපත්තිය සහ විගමණික සේවා ගිවිසුමට අදාළව මතුව ඇති කරුණු සම්බන්ධයෙන් තවදුරටත් සාකච්ඡා කළ යුතු බව සහ අදාළ නිලධාරීන් සහ බලධාරීන් එම කමිටුව හමුවට කැඳවිය යුතු බවයි.
මෙම කමිටු රැස්වීමට සංසදයේ ලේකම් පාර්ලිමේන්තුවේ කාර්ය මණ්ඩල ප්‍රධානී සහ නියෝජ්‍ය මහ ලේකම් කුෂානි රෝහණදීර මහත්මිය ද එක්ව සිටියා.
