2018 වසරේ කොටි සංවිධානය යළි නඟා සිටුවිය යුතු බවට ප්රකාශයක් සිදු කළේ යැයි කියන සිද්ධියක් සම්බන්ධයෙන් ඇප මත මුදාහැර සිටි හිටපු රාජ්ය ඇමතිනි විජයකලා මහේෂ්වරන් නීතිපති උපදෙස් මත නිදහස් කිරීමට කොළඹ මහේස්ත්රාත් අධිකරණය අද (19) නියම කළා.
මෙම පැමිණිල්ල අද (19) කොළඹ ප්රධාන මහේස්ත්රාත් ප්රසන්න අල්විස් මහතා ඉදිරියේ කැඳවනු ලැබුවා.
මීට පෙර පොලීසිය විසින් අධිකරණයට දැනුම් දී තිබුණේ මෙම සැකකාරියට එරෙහිව නඩු කටයුත්තක් පවත්වාගෙන යාමට ප්රමාණවත් කරුණු නොමැති බවට නීතිපතිවරයා විසින් උපදෙස් ලබාදී ඇති බවයි.
පැමිණිල්ල අද (19) කැඳවනු ලැබූ අවස්ථාවේ දී සැකකාර විජයකලා මහේෂ්වරන් අධිකරණය හමුවේ පෙනී සිටියා.
එහිදී මහේස්ත්රාත්වරයා සඳහන් කළේ සැකකාරියට එරෙහිව නඩු කටයුත්තක් පවත්වාගෙන නොයන බවට නීතිපතිවරයා විසින් තීරණය කර ඇති හෙයින් ඇය නිදහස් කිරීමට නියම කරන බවයි.
2018 වසරේ ජූලි මස 02 වනදා යාපනය වීරසිංහම් ශාලාවේ පැවති රැස්වීමක දී කොටි සංවිධානය යළි නඟාසිටුවිය යුතු බවට ප්රකාශයක් සිදු කළේ යැයි කියන සිද්ධියක් සම්බන්ධයෙන් හිටපු රාජ්ය ඇමතිනි විජයකලා මහේෂ්වරන්ට එරෙහිව කොළඹ සංවිධානාත්මක අපරාධ විමර්ශන ඒකකය විසින් මෙම පැමිණිල්ල කොළඹ මහේස්ත්රාත් අධිකරණය හමුවේ ගොනු කර තිබුණා.
