ගම්පහ, ඉදුරුගල්ල ප්රදේශයේ නිවසක් තුළදී ඝාතනයකර එම නිවස පිටුපස වැසිකිළිවලට දමා තිබූ පුද්ගල මළ සිරුරක් අධිකරණ නියෝග මත ගම්පහ පොලිසිය විසින් අද (08) ගොඩගනු ලැබුවා.
මෙලෙස ඝාතනයට ලක්ව ඇත්තේ ඉදුරුගල්ල ප්රදේශයේම පදිංචිව සිටි 61 හැවිරිදි විවාහක අයෙක් බව පොලිසිය සඳහන් කළා.
පසුගිය වසරේ සැප්තැම්බර් මස 08 වන දින ඝාතනය සිදුවූ නිවස තුළ එම නිවසේ පදිංචිකරු සහ ඒ අවට නිවෙස් වල පදිංචිකරුවන් තිදෙනෙක් මත්පැන් පානයකර ඇති අතර එහිදී ඇති වූ බහින්බස්වීමක් දුරදිග යාමෙන් එම නිවසේ පදිංචිකරු සහ තවත් අයෙක් විසින් මත්පැන් සාදයේ සිටි එක් පුද්ගලයෙක්ට ඇඳපොළකින් පහරදී ඝාතනයකර නිවස පිටුපස වැසිකිලිවලට දමා ඇති බව විමර්ශනවලදී අනාවරණය වී තිබෙනවා.
පසුව ඝාතනයට ලක් වූ පුද්ගලයාගේ සොහොයුරකු විසින් අතුරුදන් වීමක් සම්බන්ධව ගම්පහ පොලිසියට සිදුකළ පැමිණිල්ලකට අනුව පොලිසිය විමර්ශන ආරම්භ කර ඇති බවයි වාර්තා වන්නේ.
ඒ අනුව පහරදීම සිදුකළ දෙදෙනා සහ අනිත් පුද්ගලයා ගම්පහ කොට්ඨාශ විශේෂ විමර්ශන ඒකකය මගින් පෙරේදා (06) අත්අඩංගුවට ගෙන පූගොඩ මහේස්ත්රාත් අධිකරණයට ඉදිරිපත් කර දින තුනක රැඳවුම් නියෝග මත රඳවාගෙන ප්රශ්න කිරීමට නියෝග ලබාගෙන තිබුණා..
එහිදී අදාළ සැකකරුවන් තිදෙනාගෙන් සිදු කළ ප්රශ්න කිරීම් හමුවේ ඝාතනයේ සුළ මුල සොයා ගැනීමට පොලිසියට හැකි වී තිබෙනවා.
පූගොඩ ප්රධාන මහේස්ත්රාත් අනුර සුමනසේන මහතාගේ සහ වතුපිටිවල මූලික රෝහලේ අධිකරණ වෛද්ය නිලධාරීවරයාගේ අධීක්ෂණ යටතේ සිරුර කොටස් ගොඩ ගැනුණා.
