වංචනික වීසා බලපත්‍ර භාවිතා කරමින් ඕස්ට්‍රියාව වෙත පැන යාමට තැත් කළ ශ්‍රී ලාංකික තරුණයන් දෙදෙනෙකු කටුනායක ගුවන් තොටුපොළ ආගමන විගමන දේශසීමා ආවේක්ෂණ ඒකකයේ නිලධාරීන් විසින් අත් අඩංගුවට ගෙන තිබෙනවා.
එක් තරුණයෙකු කිලිනොච්චි ප්‍රදේශයේ පදිංචි 25 හැවිරිදි අයෙක් වන අතර අනෙක් තරුණයා මුල්ලිවයික්කාල් ප්‍රදේශයේ පදිංචි 27 හැවිරිදි අයෙක්.
මෙම තරුණයන් දෙදෙනා අද උදෑසන 07.30ට තුර්කි ගුවන් සේවයේ TK- 731 දරන ගුවන් යානයෙන් තුර්කියේ ඉස්තාන්බුල් නුවර බලා පිටත්ව යාම සදහා කටුනායක ගුවන් තොටුපොළ වෙත පැමිණ තිබුණා.
ඔවුන් තුර්කි ගුවන් සේවා නිලධාරීන් හමුවේ තම ගුවන් සේවා නිශ්කාශන කටයුතු සිදු කර ගැනීමට ඉදිරිපත් කළ ලියකියවිලි අතර තිබූ ඕස්ට්‍රියා වීසා බලපත්‍ර පිළිබඳ සැක සිතූ නිලධාරීන් මොවුන් දෙදෙනා කටුනායක ගුවන් තොටුපොළ ආගමන විගමන දේශසීමා ආවේක්ෂණ ඒකකයේ නිලධාරීන් වෙත ඉදිරිපත් කර තිබෙනවා.
එහිදී සිදු කළ මූලික විමර්ශනවලදී මෙම වීසා බලපත්‍ර කූඨ ලෙස සකස් කළ ඒවා බවටයි කරුණු අනාවරණය වී ඇත්තේ.
පසුව සැකකාර තරුණයන්ගෙන් සිදු කළ ප්‍රශ්න කිරීම්වලදී බොරැල්ල ප්‍රදේශයේ තැරැව්කරුවෙකු විසින් ඒවා සකස් කර දුන් බව නිලධාරීන් හමුවේ අනාවරණය කර තිබෙනවා.
ඒ අනුව ආගමන විගමන දේශසීමා ආවේක්ෂණ ඒකකයේ නිලධාරීන් මොවුන් දෙදෙනා අත් අඩංගුවට ගෙන වැඩිදුර විමර්ශන කටයුතු සදහා කටුනායක ගුවන් තොටුපොළ අපරාධ පරීක්ෂණ දෙපාර්තමේන්තු නිලධාරීන් වෙත භාර දෙනු ලැබුවා.
