අධික වැස්ස නිසා වව්නියාවේ වැව් 415 ක් පිටාර ගලමින් තිබෙනවා.
අප ප්‍රාදේශීය වාර්තාකරු පැවසුවේ; මේ හේතුවෙන් ජන ජීවිතවල දෛනික කටයුතු සම්පූර්ණයෙන් ම ඇනහිට ඇති බවයි.
දින කිහිපයක් පුරාවට වව්නියාව දිස්ත්‍රික්කයට ඇදහැලෙන ධාරානිපාත වර්ෂාව හේතුවෙන් වව්නියාවේ පිහිටි සම්පූර්ණ වැව් 639 න් වැව් 415 ක් ම මේ වන විට පිටාර ගලන බවට වව්නියාව දිසාපති පී.ඒ. සරත්චන්ද්‍ර පවසා සිටියා.
වව්නියාවේ මහවැව් වූ පාවක්කුලම් ඇතුළු ගොවිජන සේවා දෙපාර්තමෙනේතුව, සුළු වාරිමාර්ග සහ මහා වාරිමාර්ග යටතේ ඇති වැව් 415 ක් අද උදෑසන වනවිට පිටාර ගලමින් පවතින බවයි වාර්තා වන්නේ.
මේ අනුව වව්නියාව දිස්ත්‍රික්කයේ සමස්ත වැව් 639න් ගොවිජන සේවා දෙපාර්තමේන්තුව යටතේ පවත්නා වැව් 617න් වැව් 400 ක් ද, සුළු වාරිමාර්ග යටතේ පවත්නා වැව් 17 න් වැව් 11ක් ද මහා වාරිමාර්ග යටතේ පවත්නා වැව් 5 න් වැව් 4ක් ද මේ වන විට පිටාර ගලන බවට ද වව්නියාව දිස්ත්‍රික් ලේකම්වරයා වැඩිදුරටත් පැවසුවා.
මෙලෙස වැව් පිටාර ගැලීම හේතුවෙන් වව්නියාවේ මහකන්නයේ ගොවිතැන් කරන ලද කුඹුරු ද විශාල ප්‍රමාණයක් ජලයෙන් යටවීමෙන් ගොවීන් පීඩාවට පත්ව ඇති අතර ම පවතින අයහපත් කාලගුණික තත්ත්වය හේතුවෙන් සාමාන්‍ය ජන ජීවිතයට ද දැඩි බලපෑම් එල්ල වී ඇති බවටත් තොරතුරු වාර්තා වනවා.
