මේ වනවිට රක්ෂිත බන්ධනාගාර ගතකර සිටින හිටපු රාජ්‍ය අමාත්‍ය ලොහාන් රත්වත්තේ ඇප මත මුදාහරින ලෙස ඉල්ලා ගොනු කළ පෙත්සමට විරෝධතා ගොනු කිරීමට අභියාචනාධිකරණය අද (19) නීතිපතිවරයාට කල් ලබා දුන්නා.
අදාළ පෙත්සම අද දිනයේ අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ ශෂී මහේන්ද්‍රන් යන විනිසුරුවරුන්ගෙන් සමන්විත විනිසුරු මඩුල්ල ඉදිරියේ කැඳවනු ලැබුවා.
මෙහිදී නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල් ශනිල් කුලරත්න අධිකරණය හමුවේ කරුණු දක්වමින් ඉල්ලා සිටියේ නඩුවට අදාළ විරෝධතා ගොනු කිරීම සඳහා සති හතරක කාලයක් ලබාදෙන ලෙසයි.
එම ඉල්ලීමට පෙත්සන්කාර පාර්ශ්වය වෙනුවෙන් පෙනී සිටි ජනාධිපති නීතීඥ සංජේ රාජරත්න විරුද්ධ වුණා.
ඒ සඳහා කෙටි දිනයක් ලබාදෙන ලෙසත් ජනාධිපති නීතිඥවරයා ඉල්ලා සිටි අතර, නොවැම්බර් මස 29 වැනිදාට පෙර විරෝධතා ගොනු කරන ලෙස වග උත්තරකාර පාර්ශවයට අභියාචනාධිකරණය නියෝග කරනු ලැබුවා.
එමෙන්ම අභියාචනාධිකරණය පෙත්සම සලකා බැලීම සඳහා දෙසැම්බර් මස 09 වනදා කැඳවන ලෙස නියෝග කළා.
ලියාපදිංචි නොකළ වාහනයක් මිරිහාන ප්‍රදේශයේ පිහිටි ලොහාන් රත්වත්තේගේ බිරිඳගේ නිවසේ තිබී සොයා ගැනීමේ සිද්ධියක් සම්බන්ධයෙන් ඔහු සැකපිට අත්අඩංගුවට ගෙන මේ වනවිට රක්ෂිත බන්ධනාගාර ගත කර සිටිනවා.
