මුහුණු පොතෙන් හඳුනා ගත් තරුණයෙකුගේ ඇරයුමෙන් බෙන්තොට ප්‍රදේශයේ දී පළමු වරට හමුවූ විසි හැවිරිදි තරුණියගේ ලක්ෂ දෙකක් වටිනා රන් මාලයක් පෙන්ඩනයක් හා මුද්දක් ඇතුළු රන් භාණ්ඩ කිසියම් මත් පානයක් බොන්නට දී ගලවාගෙන ගොස් ඇතැයි කියන සිද්ධියක් සම්බන්ධයෙන් බෙන්තොට පොලීසිය පරීක්ෂණ ආරම්භ කර තිබෙනවා.
ආඳාවල ප්‍රදේශයේ පදිංචි මෙම විසි හැවිරිදි තරුණිය මීට ටික කලකදී ජංගම දුරකථනයෙන් චැට් කර හඳුනාගත් අලුත්ගම කාලවිල ප්‍රදේශයේ 22 හැවිරිදි තරුණයෙකු හා පළමුවරට (17) පෙරවරුවේ හමුවීමට බෙන්තොට ප්‍රදේශය තෝරාගෙන ඇත. එහිදී දෙදෙනා මුහුදු වෙරළ ආශ්‍රිතව හමු වි කතා කර අවන්හලකට ගොස් එහිදී තරුණයා ලබාදුන් කිසියම් බිමකින් ඇය මත් වී ඇති අතර පසුව බලන විට ඇය පැළඳ සිටි රන් භාණ්ඩ නැති බව දැනගෙන දර්ගා නගරය අඹගහ හන්දියතෙක් පැමිණ ජංගම දුරකථනය වෙළඳසැලක කාන්තාවගේ උදව් ඉල්ලා මේ බව පවසා තිබේ.
පසුව ඇය ජංගම දුරකතනයේ තිබූ එම තරුණයාගේ ඡායාරූපයක් අවට සිටි පිරිස වෙත පෙන්වීමෙන් ඔහු කාලවිල ප්‍රදේශයේ පදිංචිකරුවෙකු බව දැනගෙන තිබේ. ඒ අනුව සිද්ධිය වූයේ බෙන්තොට ප්‍රදේශයේ බැවින් බෙන්තොට පොලීසියට එම තරුණිය සිය මව සමඟ ගොස් පැමිණිලි කර තිබේ .
එහිදී ක්‍රියාත්මක වූ බෙන්තොට පොලිසිය ඊට සම්බන්ධ තරුණයා සොයා නිවසට යනවිටත් ඔහු එම නිවසින් පලා ගොස් ඇති බව අනාවරණය වීමෙන් මේ සම්බන්ධයෙන් කට උත්තරයක් ලබා දීමට ඔහුගේ පියාට පොලීසියට පැමිණෙන්නැයි දැනුම් දී තිබේ. ඒ අනුව කළ සොයා බැලීමේදී සිද්ධියට මුහුණ දුන් තරුණියගේ රන් භාණ්ඩ අලුත්ගම ප්‍රදේශයේ පෞද්ගලික රන් භාණ්ඩ උකස් ස්ථානයකට උගස්කර ලබාගත් මුදල් ද රැගෙන එම සැකකාර තරුණයා නිවසින් පලාගොස් තිබේ.
එහිදී සැකකාර තරුණයාගේ පියා එම රන් භාණ්ඩ නැවත ලබා දීමට පොරොන්දු වී ඇත.
සිද්ධියට සම්බන්ධ සැකකාර තරුණයා අත්අඩංගුවට ගැනීමට පරීක්ෂණ ක්‍රියාත්මක ඇති අතර බෙන්තොට පොලිසිය වැඩිදුර විමර්ශන සිදු කරයි
