මරණ තර්ජන සහ බලපෑම් ඇති බව පවසමින් මුලතිව් මහේස්ත්රාත් ටී.සරවනරාජා ඉල්ලා අස්වීම සම්බන්ධයෙන් පූර්ණ පරීක්ෂණයක් සිදුකරන ලෙස ජනාධිපති රනිල් වික්රමසිංහ, ජනාධිපති ලේකම් සමන් ඒකනායක වෙත උපදෙස් දී තිබෙනවා.
ජනාධිපතිවරයා මෙලෙස උපදෙස් දී ඇත්තේ තමන්ට තර්ජනයක් ඇති බවට මහේස්ත්රාත්වරයා විසින් මීට පෙර කිසිදු අවස්ථාවක පොලීසියට හෝ අධිකරණ සේවා කොමිෂන් සභාවට දැනුම්දීමක් සිදු නොකර තිබීම හේතුවෙන්.
ඒ, අනුව මෙම සිද්ධිය සම්බන්ධයෙන් වහාම සොයා බලන ලෙසයි ජනාධිපති රනිල් වික්රමසිංහ උපදෙස් දී ඇත්තේ.
මේ අතර සිය ධුරයෙන් ඉල්ලා අස් වූ මුලතිව් මහේස්ත්රාත් ටී.සරවනරාජා පසුගිය 24 වනදා විදේශගතව ඇති බවට තොරතුරු වාර්තා වන අතර, ඔහු සිය ඉල්ලා අස්වීමේ ලිපිය අධිකරණ සේවා කොමිසම වෙත යොමුකර ඇත්තේ ඊට පෙර දිනයි.
විදෙස් ගතවීමට පෙර ඔහු සිය මෝටර් රථය ද විකුණා දමා ඇති බවට ද තොරතුරු වාර්තා වනවා.
