රිදියගම සෆාරි උද්‍යානයේ වාසය කරනු ලබන ‘මීරා’නම් සිංහ ධේනුව විසින් පැටවු 04 දෙනෙකු බිහි කළ බව රිදියගම සෆාරි උද්‍යානයේ භාරකරු සත්ව දෙපාර්තමෙන්තුවේ නියෝජ්‍ය අධ්‍යක්ෂ්‍ය හේමන්ත අමරසේකර මහතා පවසනවා.
පසුගිය 18 වැනි දින මෙම පැටවුන් 4 දෙනා සිංහ ධේනුව විසින් බිහි කළ බවත් එම පැටවුන්ගෙන් දෙදෙනෙකු මනා සෞඛ්‍ය තත්වයෙන් සිටින අතර දෙදෙනෙකු මව විසින් ප්‍රතික්ෂේප කළ බවයි අමරසූරිය මහතා සඳහන් කළේ.
පැටවුන් බිහි කළ සිංහ ධේනුව වයස අවුරුදු 05ක පමණ සත්වයෙකු වන අතර එම සත්වයා රිදියගම සෆාරි උද්‍යානය තුළදී ඉපදුනු සිංහ ධේනුවක් බව ද නියෝජ්‍ය අධ්‍යක්ෂකවරයා වැඩිදුරටත් ප්‍රකාශ කළා.
මව විසින් ප්‍රතික්ෂේප කරන ලද සිංහ පැටවුන් දෙදෙනා දෙහිවල සත්වෝද්‍යානයේ පැටවුන් රැකබලා ගැනීමේ මධ්‍යස්ථානයට යොමු කර පෝෂණය කරන බව සඳහන්.
නියෝජ්‍ය අධ්‍යක්ෂකවරයා ප්‍රකාශ කළේ පැටවුන් බිහි කිරීමේදී දුර්වල සතුන් මව විසින් ප්‍රතික්ෂේප කරන බවයි.
මේ වන විට රිදියගම සෆාරි උද්‍යානය තුළ සිංහයන් 20 දෙනෙකු පමණ සිටින අතර ඔවුන් ගෙන් දස දෙනෙකු පමණ සෆාරි උද්‍යානය තුළම ඉපදුනු සත්වයන් වනවා.
ඉතිරි සිංහයින් දස දෙනා චීනය, ජර්මනිය හා අප්‍රිකානු රටවලින් රැගෙන විත් තිබෙනවා.
මීට අමතරව බෙංගාල ව්‍යාඝ්‍ර ධේනුවක් ද පැටවුන් බිහි කිරීමට ආසන්නව සිටින අතර තව සති කිහිපයකින් ඔවුන් ද රිදියගම සෆාරි උද්‍යානයට පැමිණෙන්නට දැක ගැනීමට අවස්ථාව හිමිවන බව සත්ව උද්‍යාන නියෝජ්‍ය අධ්‍යක්ෂක හේමන්ත අමරසේකර මහතා සඳහන් කළා.
