මීගහකිවුල, අරාව පාර ප්රදේශයේ දෙපිරිසක් අතර ඇති වූ ගැටුමක් දුරදිග යෑමෙන් සිදු වූ පහරදීමකින් බරපතළ තුවාල ලැබූ කාන්තාවක් සහ දේවාලයක කපුවෙක් අද (11) අලුයම මීගහකිවුල දිසා රෝහලට ඇතුළත් කර තිබෙනවා.
මෙලෙස රෝහල්ගත කර ඇත්තේ මීගෙකිවුල, අරාව පාර ප්රදේශයේ පදිංචි වයස අවුරුදු 61ක කාන්තාවක් සහ 41ක පුද්ගලයෙක්.
එකම පවුලක ඥාතීන් දෙපිරිසක් අතර ඉඩමක් සම්බන්ධයෙන් කලක සිට පැවති ආරවුලක් දුරදිග යාමෙන් මෙම පහරදීම සිදුව තිබෙනවා.
පහරදීමට පැයකට පමණ පෙර පොලිස් හදිසි දුරකථන ඇමතුම් අංකයට ලද තොරතුරක් මත කන්දකැටිය පොලිසියේ නිලධාරීන් පිරිසක් පැමිණ දෙපාර්ශ්වය සමථයකට පත්කර තිබෙනවා.
කෙසේ වෙතත් පොලිසිය එම ස්ථානයෙන් පිටව යාමත් සමඟ දෙපිරිස අතර ආරවුල යළි උත්සන්න වී මෙම පහරදීම සිදුකර ඇති බවයි වාර්තා වුණේ.
පහර කෑමට ලක්වූ දේවාලයේ කපුවා පොලිසියට පවසා ඇත්තේ දේවාලයේ කටයුතු දෛනික කටයුතු අවසන්කර රාත්රී ආහාරය ගැනීම සඳහා නිවසට පැමිණ සිටිය දී පිරිසක් පැමිණ තමන්ට පහර දුන් බවයි.
