හිටපු ජනාධිපති මහින්ද රාජපක්ෂට සහ හිටපු අමාත්ය පියංකර ජයරත්නට ලබන 12 වනදා අල්ලස් හෝ දූෂණ චෝදනා විමර්ශන කොමිෂන් සභාව හමුවේ ප්රකාශයක් ලබාදෙන ලෙස එම කොමිසම දැනුම්දීමක් කර තිබෙනවා.
ඒ, අල්ලස් හෝ දූෂණ විමර්ශන කොමිෂන් සභාව විසින් සිදුකරනු ලබන ප්රශ්නගත එයාර්බස් ගනුදෙනුවට අදාළ විමර්ශනවලට අදාළවයි.
ශ්රී ලන්කන් ගුවන් සමාගමට එයාර්බස් A-330 ගුවන් යානා 06ක් සහ A- 350 වර්ගයේ ගුවන් යානා 08ක් 2013 වසරේදී මිලට ගැනීමේදී ඇමරිකා ඩොලර් මිලියන 02ක මුදලක් අල්ලස් ලෙස ලබාගත් බවට එවක ශ්රීලන්කන් ගුවන් සේවයේ ප්රධාන විධායක නිලධාරී කපිල චන්ද්රසේනට සහ ඔහුගේ බිරිඳ වන නියෝමාලි විජේනායකට චෝදනා එල්ල වී තිබෙනවා.
ඒ සම්බන්ධයෙන් සිදුකෙරෙන විමර්ශනයකට අදාළව කපිල චන්ද්රසේන පසුගිය මාර්තු 12 වනදා අල්ලස් කොමිසමේ අත්අඩංගුවට ගැනුණු අතර, පසුව මැයි මස 05 වනදා දක්වා රක්ෂිත බන්ධනාගාරගත කෙරුණා.
එහිදී එයාර් බස් ගනුදෙනුවෙන් අල්ලස් වශයෙන් ලැබුණු මුදල් සැකකාර කපිල චන්ද්රසේන විසින් හිටපු ජනාධිපති මහින්ද රාජපක්ෂට සහ හිටපු ගුවන් සේවා අමාත්ය පියංකර ජයරත්නට ලබා දී ඇති බවට අනාවරණය වී ඇතැයි අල්ලස් කොමිසම කොළඹ මහේස්ත්රාත් අධිකරණයට දැනුම් දුන්නා.
