ප්රමිතියෙන් තොර කාබනික පොහොර නැවක් ඉකුත් රජය සමයේ මෙරටට ආනයනය කිරීමේ සිද්ධියකට අදාලව හිටපු කෘෂිකර්ම අමාත්ය මහින්දානන්ද අලුත්ගමගේ ඇතුළු සැකකරුවන් දෙදෙනෙකුට එරෙහිව අල්ලස් කොමිසම ගොනු කර තිබෙන නඩුව දෙසැම්බර් 04 යළි කැදවිමට කොළඹ ප්රධාන මහේස්ත්රාත් අසංග එස්. බෝදරගම මහතා අද (25) දින නියම කළා.
අල්ලස් කොමිසම වෙනුවෙන් අධිකරණයේ පෙනී සිටි නිලධාරින් වැඩිදුර වර්තාවක් අධිකරණයට ඉදිරිපත් කරමින් කරන ලද කරුණු සලකා බැලීමෙන් අනතුරුව මෙලෙස නියෝග කර සිටියා.
සිද්ධියට අදාළ පළමු වන සැකකරු වන අමාත්ය මහින්දානන්ද අලුත්ගමගේ අද දින බන්ධනාගාර නිලධාරීන් විසින් අධිකරණයට ඉදිරිපත් කර තිබුණා.
සිද්ධියට අදාළ දෙවන සැකකරු වන මහේෂ් ලසන්ත ගම්මන්පිල ද අද දිනයේ අධිකරණයේ පෙනි සිටියා.
ප්රමිතියෙන් තොර චීන කාබනික පොහොර නැවක් ආනයනයට නීත්යානුකූල අනුමැතිය ලැබීමට පෙර ණයවර ලිපි විවෘත කිරීමෙන් රජයට රුපියල් කෝටි 130කට අධික පාඩුවක් සිදු කළේ යැයි කියන සිද්ධියට අදාළව මෙම සැකකරුවන්ට චෝදනා ගොනු කර තිබෙනවා.
මීට අදාළව මූලික විමර්ශන කටයුතු අවසන් බවත් උදෘත ගොනු කිරීමට කටයුතු කරන බවයි අල්ලස් කොමිසම අධිකරණයට දන්වා සිටියේ.
සිද්ධියට අදාළ නඩුව දෙසැම්බර් 04 යළි කැඳවිමට නියමිතයි.
