ගතවූ දින දෙකක කාලය තුල විවිධ මත්ද්‍රව්‍ය රැගෙන ශ්‍රී පාද වන්දනාවේ පැමිණි තරුණයන් 35 දෙනෙකු පොලිස් අත්අඩංගුවට ගෙන තිබෙනවා.
මෙම පිරිස අතරින් 12 දෙනෙකු පොලිස් නිල සුනඛ ස්ටවුඩ්ගේ සහාය මත හදිසි මාර්ග බාධක යොදා ශ්‍රී පාද වන්දනාකරුවන් රැගෙන එනු ලබන රථ වාහන පරීක්ෂාවල දී හැටන් කොට්ඨාශ අපරාධ විමර්ෂණ අංශ නිලධාරීන් විසිනුයි අත් අඩංගුවට ගෙන ඇත්තේ.
අනෙක් පිරිස හැටන් කොට්ඨාශයේ තවත් පොලිස් ස්ථාන කිපයක දී අත් අඩංගුවට ගෙන තිබෙනවා.
ඒ අනුව ගංජා රැගෙන පැමිණි 20ක්, ගංජා මිශ්‍ර මදන මෝදක රැගෙන පැමිණි 8ක්, මත් පෙති රැගෙන ආ 04ක්, හෂිස් මත්ද්‍රව්‍ය රැගෙන පැමිනි 3ක් වශයෙන් අත් අඩංගුවට පත්වී ඇතැයි සඳහන්.
එමෙන්ම සැකකරුවන් සතුව තිබී ගංජා ග්‍රෑම් 50ක්, මදන මෝදක 120ක්, මත් පෙති 12ක්, හෂිස් මිලි ග්‍රැම් 500ක් ද සොයාගෙන තිබෙනවා.
අත්අඩංගුට පත් වූ සියලුම දෙනා අවුරුදු 18ත් 25ත් අතර පසුවන්නන්.
මෙම තරුණයන් තම දෙමාපියන් නොමැතිව මිතුරන් සහ ගම්වාසීන් සමග ශ්‍රී පාදය වන්දනා කිරීමට පැමිණි පිරිසක් බවට මූලික පොලිස් පරීක්ෂණවලදී හෙළිවී තිබෙනවා.
මේ අතර මෙවර සති අන්තයේ ශ්‍රී පාදය වන්දනා කිරීම සඳහා වන්දනාකරුවන් විශාල පිරිසක් පැමිණ තිබෙනවා.
මේ හේතුවෙන් වන්දනාකරුවන් විශාල පිරිසකට දිගු පෝලිම්වල රැඳී සිටීමට සිදුවූ බවයි අප වාර්තාකරුවන් සඳහන් කළේ.
මෙම සති අන්තයේ පාසල් නිවාඩුව නිම වීමට පෙර ශ්‍රී පාදය වන්දනා කිරිම සදහා ශ්‍රී ලංකාවේ විවිධ ප්‍රදේශවල සිට වන්දනාකරුවන් ලක්ෂයකට අධික පිරිසක් පිරිසක් පැමිණීමත් සමග මෙම තත්වය නිර්මාණය වී තිබෙනවා.
වන්දනාකරුවන් රැගෙන රථ වාහන ද විශාල ප්‍රමාණයක් පැමිනිමත් සමග නල්ලතන්නිය ප්‍රදේශයේ නැවතුම් පොළවල් ප්‍රමාණවත් නොවීම හමුවේ වාහන විශාල ප්‍රමාණයක් නල්ලතන්නිය මස්කෙළිය මාර්ගයේ කිලෝමීටර් තුනක පමණ දුරකට මාර්ගය අයිනේ නතර කර තැබීමටයි පොලිසිය පියවර ගෙන ඇත්තේ.
දුම්රියෙන් හා පොදු ප්‍රවාහන සේවාවලින් පැමිණි වන්දනාකරුවන්ගේ ගමන් පහසුව සදහා හැටන් නල්ලතන්නිය අතර එම ලංගම හා පුද්ගලික බස් රථ යොදවා තිබෙනවා.
