මේ වන විට (23) මධ්‍යම බෙංගාල බොක්ක අවට පවතින පීඩන අවපාතය අද උදෑසන කාලයේ දී සුළි සුළඟක් බවට වර්ධනය වන බව කාලගුණ විද්‍යා දෙපාර්තමේන්තුව නිවේදනය කරනවා.
කාලගුණ විද්‍යා දෙපාර්තමේන්තුවේ කාර්යයේ නියුතු කාලගුණ විද්‍යාඥ චමින්ද සිල්වා මහතා අවධාරණය කළේ මේ හේතුවෙන් අද දිනයේ දී බොහෝ ප්‍රදේශවලට මිලිමීටර් 75ට වැඩි තද වැසි ඇති වීමේ හැකියාවක් ඇති බවයි.
හෙට (24) වන විට මෙය චණ්ඩ සුළි කුණාටුවක් බවට පත් ව ඉන්දියාවේ ඔඩිෂා වෙරළ තීරයෙන් ඉන්දියානු අර්ධද්වීපය වෙත ගමන් කරන බව ද ඔහු පවසනවා.
මේ හේතුවෙන් බෙංගාල බොක්ක අවට මුහුදු කලාපයේ ධීවර හා නාවික කටයුතුවල නොයෙදන ලෙසයි කාලගුණ විද්‍යා දෙපාර්තමේන්තුව අනතුරු අඟවන්නේ.
බස්නාහිර, සබරගමුව, දකුණ, වයඹ පළාත්වලත්, මහනුවර, නුවරඑළිය දිස්ත්‍රික්කවලත් මිලිමීටර් 75 ඉක්මවූ වැසි ඇති විය හැකි අතර සෙසු ප්‍රදේශවලට ද සවස් කාලයේ හෝ රාත්‍රී කාලයේ වැසි ඇති විය හැකි බව ද වාර්තා වනවා.
ගිගුරුම් සහිත වැසි ඇති වන විට තද සුළං ද ඇති විය හැකි බව පවසන කාලගුණ විද්‍යාඥ චමින්ද සිල්වා පැවසුවේ දිවයින ආශ්‍රිත මුහුදු ප්‍රදේශවල ද විටින් විට වැසි ඇති විය හැකි බවයි.
කන්කසන්තුරේ සිට මන්නාරම හරහා පුත්තලම දක්වා මුහුදු තීරයේත් හම්බන්තොට සිට පොතුවිල් දක්වා මුහුදු ප්‍රදේශයෙත් විටින් විට සුළඟේ වේගය වැඩි විය හැකි බවත් එය පැයට කිලෝමීටර් 45-50 දක්වා අගයක් ගත හැකි බව ද වාර්තා වනවා.
