ලංකා ප්‍රීමියර් ලීග් තරගාවලියේ ආචාර ධර්ම සහ විනය චෝදනා උල්ලංඝනය කිරීම් සම්බන්ධයෙන් වේග පන්දු ක්‍රීඩක බිනුර ප්‍රනාන්දුට දඩ ගෙවීම් නියම කර තිබෙනවා.
මේ දිනවල කොළඹ සහ පල්ලෙකැලේ දී පැවැත්වෙන මෙම තරගාවලියේ දී බිනුර ප්‍රනාන්දු ක්‍රීඩා කරන්නේ කලම්බු ස්ට්‍රයිකර්ස් කණ්ඩායම වෙතයි.
පසුගියදා (ජූලි 02) කලම්බු කණ්ඩායම සහ කැන්ඩි ෆැල්කන්ස් කණ්ඩායම අතර පැවති තරගයේ දී බිනුර විසින් ක්‍රීඩක ආචාර ධර්ම කඩන ලදැයි චෝදනා ලැබ තිබෙනවා.
විනිසුරුවරුන්ගේ උපදෙස්වලට ගරු නොකිරීම සහ අවනත නොවීමේ චෝදනාවට LPL චර්යාධර්ම සංග්‍රහයේ 2.4 වගන්තිය යටතේයි ඔහුට චෝදනා එල්ල වී ඇත්තේ.
බිනුර ප්‍රනාන්දුට එරෙහි ව පැවති විනය පරීක්ෂණයේ දී හෙතෙම සිය වරද පිළිගෙන ඇති බවත් වාර්තා වනවා.
ඒ අනුව ඔහුගේ තරග ගාස්තුවෙන් සියයට 20ක දඩ මුදලක් සහ දඬුවම් ලකුණක් ද ලබා දී ඇති බවයි ක්‍රීඩා ආරංචි මාර්ග පවසන්නේ.
මීට අමතර ව LPL ඇඳුම් පැළඳුම් හා උපකරණ රෙගුලාසි කඩකිරීම සම්බන්ධයෙන් ද බිනුර ප්‍රනාන්දුගේ තරග ගාස්තුවෙන් සියයට 25ක් දඩ ලෙස අයකරගෙන ඇති අතර වනිඳු හසරංගට ද එම දඬුවම ම හිමි ව ඇත්තේ ඇඳුම් සම්බන්ධයෙන් ඇති වූ විනය චෝදනාවකටයි.
