බිත්තර ආනයනය කිරීමේදී පනවා තිබූ ආනයන බදු පසුගියදා අඩු කළද, එය අදාළ වන්නේ රාජ්‍ය අංශයට පමණක් බව මුදල් රාජ්‍ය අමාත්‍ය රංජිත් සියඹලාපිටිය මහතා පවසනවා.
අමාත්‍යවරයා මේ බව ප්‍රකාශ කළේ අද සවස රුවන්වැල්ල ප්‍රදේශයේ දී පැවති ක්‍රීඩා වැඩසටහනකට සහභාගී වූ අවස්ථාවේ මාධ්‍ය වෙත අදහස් දක්වමින්.
මෙහිදී අමාත්‍ය රංජිත් සියඹලාපිටිය පැවසුවේ බිත්තර ආනයනය කිරීමට හේතු වූයේ රටතුළ පවතින බිත්තර හිඟය බවයි.
බිත්තර හිඟය, ආහාර නිෂ්පාදන කර්මාන්තය පවත්වාගෙන යෑමට බාධාවක් බැවින් බිත්තර ආනයනය සඳහා පැවති බදු අඩු කළ අතර එම අඩු කිරීම අදාළ වන්නේ රාජ්‍ය වාණිජ විවිධ නීතිගත සංස්ථාව සඳහා පමණක් ම බව ද අමාත්‍යවරයා අවධාරණය කළා.
එලෙස ආනයනය කරන බිත්තර සියල්ල තොග වශයෙන් නිෂ්පාදන කර්මාන්තවලට ලබාදෙන බවත්, ඒ හේතුවෙන් දේශීය බිත්තර නිෂ්පාදකයාට කිසිදු බලපෑමක් එල්ල නොවන බවත් අමාත්‍යවරයා පෙන්වා දුන්නා.
මේ අතර ආනයනය කරන ලද පළමු බිත්තර තොගය සඳුදා (27) දිවයිනට පැමිණීමට නියමිත බව වෙළඳ අමාත්‍ය නලින් ප්‍රනාන්දු මහතා පවසනවා.
ශ්‍රී ලංකා රාජ්‍ය වෙළඳ සංස්ථාව මගින් පළමු බිත්තර තොගය ආනයනය කර ඇති බවයි අමාත්‍යවරයා සඳහන් කළේ.
අමාත්‍යවරයා පැවසුවේ පළමු බිත්තර තොගයේ කොටසක් ලෙස ඉන්දියාවෙන් බිත්තර මිලියන දෙකකට වැඩි ප්‍රමාණයක් ආනයනය කර ඇති බවයි.
මේ අතර බිත්තර ආනයනයේදී පනවා තිබූ විශේෂ වෙළඳ භාණ්ඩ බද්ද සංශෝධනය කිරීමට ද පියවර ගෙන තිබෙනවා.
බිත්තරයක් ආනයනය කිරීමේදී පනවා තිබූ රුපියල් 50ක විශේෂ වෙළෙඳ භාණ්ඩ බද්ද ශ්‍රී ලංකා රාජ්‍ය වෙළෙඳ සංස්ථාව විසින් පෙබරවාරි 21 වැනිදා සිට ක්‍රියාත්මක වන පරිදි රුපියල් 1 දක්වා අඩු කළා.
එම බදු සංශෝධනය මාස තුනක කාලයක් සඳහා බලපැවැත්වෙන බවයි වෙළඳ අමාත්‍යාංශය ප්‍රකාශ කළේ.
