පවතින මැතිවරණ නීති උල්ලංඝනය කරමින් බදුල්ල නගරයේ මැතිවරණ ප්‍රචාරණ කටයුතුවල නිරත වූ හිටපු අමාත්‍ය හරින් ප්‍රනාන්දු ඇතුළු කණ්ඩායමක් සහ පොලිස් නිලධාරීන් අතර අද (11) උණුසුම් තත්ත්වයක් හටගෙන තිබෙනවා.
හිටපු අමාත්‍යවරයා ඇතුළු ඔහුගේ ආධාරකරුවන් පිරිසක් පැළඳ සිටි ඇඳුම් මැතිවරණ නීති උල්ලංඝනය කිරීමක් බවට බදුල්ල දිස්ත්‍රික් මැතිවරණ ආරවුල් නිරාකරණය කිරිමේ මධ්‍යස්ථානයේ නිලධාරින්ට සහ පොලීසියට නිරීක්ෂණය වී තිබෙනවා.
එමෙන්ම පස්දෙනෙකුට වඩා වැඩි පිරිසක් මෙම ප්‍රචාරක කටයුතු සඳහා එක්ව ඇති අතර, එය ද මැතිවරණ නීති උල්ලංඝනය කිරීමක් බවයි පොලිසිය පවසා ඇත්තේ.
ඒ අනුව එම ප්‍රචාරක කටයුතු නතර කිරීමටයි අදාළ පිරිසට උපදෙස් ලබා දී ඇත්තේ.
එම අවස්ථාවේ දී අමාත්‍යවරයා ඇතුළු ඔහුගේ ආධාරකරුවන් සහ පොලීසය සමඟ උණුසුම් තත්ත්වයක් හටගෙන ඇති බවයි තොරතුරු වාර්තා වුණේ.
මේ අතර ඊයේ (10) දිනයේ බණ්ඩාරවෙල නගරයේ දී ද හිටපු අමාත්‍ය හරීන් ප්‍රනාන්දු මැතිවරණ ප්‍රචාරණ කටයුත්තක් අතර තුර පොලිස් නිලධාරීන් සමඟ වචන හුවමාරුවක පැටලෙන ආකාරය දැකගත හැකි වුණා.
