බස් අනතුරකින් කාන්තාවක් ජීවිතක්ෂයට – 23කට තුවාල

තුල්හිරිය තැපැල් කාර්යාලය අසලදී සිදු වූ අනතුරකින් කාන්තාවක් මියගොස් තවත් පිරිසක් තුවාල ලබා තිබෙනවා.

ලංගම බස් රථයක් සහ කන්ටේනර් ප්‍රවාහනය කරනු ලබන ප්‍රයිම් මුවර් රථයක් ගැටීමෙනුයි අද පෙරවරුවේ මෙම අනතුර සිදුවී ඇත්තේ.

අනතුරින් මියගොස් ඇත්තේ දොම්පේ මීගහවත්ත ප්‍රදේශයේ පදිංචි 51 හැවිරිදි කාන්තාවක්.

අද පෙරවරු 10.30ට පමණ කොළඹ – කුරුණෑගල මාර්ගයේ තුල්හිරිය ප්‍රදේශයේ දී කන්ටේනර් රථය ඉදිරියෙන් ගමන් කළ වාහනයක් පසු කර යාමට උත්සාහ කිරීමේදී ඉදිරියෙන් පැමිණි බස් රථයේ ගැටී තිබෙනවා.

බස් රථය අනතුර සිදු වනවාත් සමග මාර්ගයෙන් ඉවතට පැන පෙරළී ගොස් ඇතැයි සඳහන්.

අනතුරින් 23දෙනෙකු තුවාල ලබා වරකාපොළ මූලික රෝහලට ඇතුලත් කර ඇති අතර ඉන් තුන් දෙනෙකුගේ තත්වය බරපතල බැවින් කොළඹ ජාතික රෝහලට මාරු කර යවා ඇති බවයි අප වාර්තාකරු සඳහන් කළේ.

කන්ටේනර් රථය කුරුණෑගල දෙස සිට කොළඹ දෙසට ගමන් කර ඇති අතර බස් රථ⁣ය කොළඹ දෙස සිට අනුරාධපුර දක්වා ධාවනය වෙමින් තිබූ එකක්.

කන්ටේනර් රථයේ රියදුරා වරකාපොළ පොලිසිය මගින් අත්අඩංගුවට ගෙන තිබෙනවා.

අනතුරින් තුවාල ලැබුවන් 12 දෙනෙකු මේ වන විට වරකාපොළ රෝහලේ ප්‍රතිකාර ලබන අතර අනෙක් පිරිස ප්‍රතිකාර ලබා පිටව ගොස් තිබෙනවා.