පොහොර ලැබෙන තුරු මහවැලි සී කලාපයේ ගොවිතැන් කටයුතු නතර කිරීමට ගොවි සංවිධාන තීරණය කර තිබේ.
ඒ එලඹෙන මහ කන්නයට අදාළව පොහොර ලබාදීමේ ක්රමවේදය මෙතෙක් සකස් කර නොමැති බවට කන්න රැස්වීමේදී නිලධාරීන් පැවසීමත් සමගය.
එලඹෙන මහ කන්නයේ වගා කටයුතු සඳහා ජලය නිකුත් කිරීම හා වගා කාල සටහන පිළිබඳව මහවැලි සී කලාපයේ ගිරාඳුරුකෝට්ටේ ගොවීන් දැනුවත් කිරීමට කන්න රැස්වීම ඊයේ (06) පැවැත්වුණි.
ගිරාඳුරුකෝට්ටේ මහවැලි කොට්ඨාස කළමනාකරණ කාර්යාලයේ පැවැති මෙම රැස්වීමට ගොවි සංවිධාන 52ක නිලධාරීන් එක්වී තිබේ.
මෙහිදී ඉදිරිපත් කළ වගා කාල සටහනේ ගැටලු සහගත තත්ත්වයත් සමග ගොවීන්ගෙන් මහවැලි නිලධාරීන්ට දැඩි විරෝධයක් එල්ලවී තිබුණි.
පොහොර ලබාදීමේ ක්රමවේදයක් තවමත් සකස් කර නොමැති බවට නිලධාරීන් පැවසීමත් සමග එය නොසන්සුන් තත්ත්වයක් දක්වා වර්ධනය වී ඇත.
“අපිට රසායනික පොහොර නවත්වලා. කාලසටහනක් හදලා දුන්නට අපිට කෝ වල්නාශක. දිගින් දිගටම වටේ යන්න ඕනේ නෑ. ගන්න තීන්දුවක් ගමු,” යනුවෙන් ගොවි සංවිධාන නියෝජිතයින් පැවසීය.
මේ අතර කන්තලේ ප්රාදේශීය ලේකම් කාර්යාලේ ඊයේ පැවති කන්න රැස්වීමේදීද නොසන්සුන් තත්ත්වයක් ඇතිවී තිබේ.
“බලෙන් පිහියක් අතට දීලා මේ කියන්නේ ඇණ ගනින් කියලා. බලෙන් ෆෝම් එක දීලා.. මම පොහොර හදමි, මම පොහොර හදන්න පොරොන්දු වෙමි, මේ ඔක්කොම හිතාගෙන ඉන්නේ ගොවියට කැසිල්ල කියලා,” යනුවෙන් එහි සිටි ගොවීන් පැවසීය.
ඒ මහ කන්නයට අවශ්ය පොහොර නිකුත් කිරීමේ ක්රමවේදයේ ගැටලු පැවතීම හේතුවෙනි.
මේ අතර මුං වගාවට අවශ්ය පොහොර නොමැති නිසා ඇලහැර හා පරාක්රම ගොවිජන ව්යාපාරවල ගොවීන්ට වගාවන් සිදුකර ගැනීමට නොහැකි තත්ත්වයක් උද්ගතවී තිබේ
