ඉදිරි මැතිවරණයක තරග වැදීම සඳහා පොදු සන්ධානයක් ගොඩනැගීමේ බලය පක්ෂ නායක සජිත් ප්‍රේමදාස මහතාට ලබාදීමට ඊයේ රැස්වූ සමගි ජන බලවේගයේ කෘත්‍යාධිකාරී මණ්ඩලය තීරණය කර තිබෙනවා.
එසේම, වැට් බදු පැනවීම ඇතුළු ජීවන බරට විසඳුම් ඉල්ලා ජනවාරි මාසයේදී රට පුරා උද්ඝෝෂණ මාලාවක් පැවැත්වීමටද මෙහිදී තීරණය කළ බවයි ඊට එක්වූ නියෝජිතයන් කියා සිටියේ.
මෙම කෘත්‍යාධිකාරී මණ්ඩල රැස්වීම ඊයේ පැවැත්වුණේ පිටකෝට්ටේ පිහිටි සමගි ජන බලවේගයේ පක්ෂ මූලස්ථානයේදීයි. වසරේ අවසන් කෘත්‍යාධිකාරී මණ්ඩල රැස්වීම වූ එහිදී සාකච්ඡා වූ කරුණු සම්බන්ධයෙන් රැස්වීමෙන් අනතුරුව ඊට එක්වූ නියෝජිතයන් කිහිප දෙනෙකුම අදහස් පළ කළා.
