පෙම්වතෙකු සිය පෙම්වතියව ලැගුම්හලකට කැඳවාගෙන ගොස්, එහි කළමනාකරු සමඟ එක්ව ඇයව කාමරයක රඳවා දින 02ක් විවිධ පුද්ගලයින්ට අලෙවිකළ බව කියන සිද්ධියක් සම්බන්ධයෙන් අදාළ ලැගුම්හලේ කළමනාකරු අත්අඩංගුවට ගෙන තිබෙනවා.
අගලවත්ත ඕමත්ත පාරේ, ලැගුම්හලක කළමනාකරුවෙකු මෙලෙස අත්අඩංගුවට ගෙන ඇති බවයි තොරතුරු වාර්තා වන්නේ.
පෙම්වතා සහ ලැගුම්හලේ කළමනාකරු විසින් අදාළ තරුණියව පුද්ගලයන් සිව්දෙනෙකුට අලෙවිකර ඇති බවටයි තොරතුරු අනාවරණය වී ඇත්තේ.
මෙම සිද්ධියට සම්බන්ධ බව කියන සැකකාර පෙම්වතා ප්රදේශයෙන් පළාගොස් ඇති අතර, ඔහු සොයා විමර්ශන ආරම්භකර ඇති බවයි අගලවත්ත පොලිසිය පැවසුවේ.
කාන්තාවක් ලැගුම්හලක රඳවාගෙන පුද්ගලයන්ට මුදලට අලෙවි කරන බවට 119 පොලිස් හදිසි ඇමතුම් අංකයට ලද තොරතුරක් මතයි මෙම සිද්ධිය පිළිබඳව තොරතුරු අනාවරණයකර ගැනීමට හැකිව ඇත්තේ.
සිද්ධියට සම්බන්ධ වූ තරුණිය ඇඟලුම්හල් සේවිකාවක බවත්, ඇය වෛද්ය පරීක්ෂණයක් සඳහා රෝහල් ගතකර ඇති බවත් පොලීසිය සඳහන් කළා.
අත්අඩංගුවට ගත් සැකකාර කළමනාකාරවරයා මතුගම මහේස්ත්රාත් අධිකරණය වෙත ඉදිරිපත් කිරීමට නියමිතව තිබුණා.
