පුටින්ගෙන් සම්මානය දිනාගත් ලාංකීය විශිෂ්ඨයා මව්බිමට පැමිණේ

රුසියානු සමූහාණ්ඩුවේ ජනාධිපති ව්ලැඩිමීර් පුටින් නිකුත් කළ ආඥාවක් අනුව තමන්ට ” මිත්‍රවයේ සම්මානය ”  හිමි වූ බව එම සම්මානය හිමි කර ගෙන මෙරටට පැමිණි වෛද්‍ය සමන් රංජිත් වීරසිංහ අද (08) දින උදෑසන කටුනායක ගුවන් තොටුපොළේ දී පැවසුවා.

මෙම සම්මානය ලබා දීම සදහා රුසියාව සහ ශ්‍රී ලංකාව අතර පවතින මිත්‍රත්වය වෙනුවෙන් සිදු කර ඇති කාර්යය භාරය මෙන්ම  ආර්ථික , මානුෂීය සම්බන්ධතාවය පිළිබද සිදු කර ඇති මෙහෙවර සඳහා ඇගැයීමක් සිදු කර මෙම සම්මානය , රුසියාවට ජාතික වශයෙන් වැදගත් දිනයක් වන ඉකුත් 04 දින ක්‍රෙම්ලින් මන්දිරයේ දී ජනාධිපති ව්ලැඩිමීර් පුටින් විසින් පෞද්ගලිකව පිරිනැමීමට කටයුතු කරනු ලැබුවා.

මෙහිදී මාධ්‍ය වෙත අදහස් දැක්වූ වෛද්‍ය සමන් වීරසිංහ, දෙරට අතර සම්බන්ධතා ආරම්භ වී වසර 69 ක කාළය තුළ, කිසිදු ප්‍රශ්ණයක් ඇති වී නොමැති බවත්, ගෝලීය ගැටළුවලදී, ශ්‍රී ලංකාවට යම් යම් ගැටළු මතු වූ අවස්ථාවලදී ඍජුව උදව් කර තිබෙන බවත්, මානව හිමිකම් ගැටළුවලදී එක් අවස්ථාවක එක්සත් ජාතීන්ගේ ආරක්ෂක මණ්ඩලයේ ශ්‍රී ලංකාවට එරෙහිව යෝජනාවක් ඉදිරිපත් වූ අවස්ථාවේ රුසියාව නිශේධ බලය පාවිච්චි කරමින් එම යෝජනාව ඉවත ලෑමට පියවර ගෙන ඇති බවත් කියා සිටියා.

රුසියාව කවදාවත් අපේ රටට යම් යම් දේ කරන්න කියල බල කරල නැහැ, ඒ රටේ වැඩ වලට සම්බන්ධ වෙන්න කියල බලපෑම් කරල නැහැ, ඉතිං මේ වගේ මිතුරු රාජ්‍යයක් සම්බන්ධතාවය මිල මුදලින් අගය කිරීමට නොහැකි තරම් වටිනවා යැයි ද වෛද්‍ය සමන් වීරසිංහ වැඩිදුරත් සඳහන් කළා.

මෙම සම්මානය මෙම වසරේ හිමිකර ගත් ආසියානූ කළාපයේ එකම පුද්ගලයා වෛද්‍ය සමන් වීරසිංහ වන අතර , එම සම්මානය රැගත් වෛද්‍ය සමන් වීරසිංහ අද දින උදෑසන 08.35 ට ඩුබායි සිට එමිරේට්ස් ගුවන් සේවයේ ඊ.කේ.- 650 දරන ගුවන් යානයෙන් කටුනායක ගුවන් තොටුපොළ පැමිණියා.