ඇඹිලිපිටිය මහගම ප්රදේශයේ තිරිවාන නිධිය කැණීම සම්බන්ධයෙන් කිසිදු ඉදිරි පියවරක් නොගන්නා බවට නීතිපතිවරයා විසින් අභියාචනාධිකරණයට පොරොන්දු වී තිබෙනවා.
මෙට්රික් ටොන් 7,30,000ක් වන අදාළ තිරිවාන නිධිය කැණීම සඳහා නීත්යානුකූලව ලංසු ඉදිරිපත් කර ලබාගත් ව්යාපෘතිය වෙනුවෙන් රුපියල් කෝටි 44කට අධික මුදලක් වැයකර තිබියදී පසුගිය රජය අමාත්ය මණ්ඩල පත්රිකාවක් මගින් එම ව්යාපෘතිය වෙනත් සමාගම් දෙකකට දීමට කටයුතු කර තිබෙන බව පවසමින් ව්යවසායකයකු ගොනු කර තිබු රිට් පෙත්සමක් කැඳවු අවස්ථාවේ දී නීතිපතිවරයා වෙනුවෙන් පෙනී සිටි රජයේ ජ්යෙෂ්ඨ නීතිඥ ෂෙහාන් සොයිසා මහතා අදාළ පොරොන්දුව ලබා දුන්නා.
රිට් පෙත්සම නොවැම්බර් 18 වැනිදා යළි කැඳවීමට අධිකරණය නියම කළ අතර අදාළ පොරොන්දුව එදින තෙක් බලපැවැත්වීමට අධිකරණය නියම කළා.
සෝභිත රාජකරුණා සහ මහේන් ගොපල්ලව යන මහත්වරුන්ගෙන් සමන්විත විනිසුරු මඩුල්ලක් හමුවේ රිට් පෙත්සම ඊයේ (02) සලකා බැලුවා.
‘තිසූකා කෝබේ’ සමාගම සහ එහි හිමිකරු වන සුනිමල් ජයන්ත රුද්රිගු මහතා ගොනු කර තිබූ පෙත්සමේ වගඋත්තරකරු වශයෙන් හිටපු අග්රාමාත්ය දිනේෂ් ගුණවර්ධන මහතා ඇතුළු අමාත්ය මණ්ඩලය නම්කර තිබෙනවා.
නීතිඥ රම්සි බචා නීතිඥ සමාගම මගින් රිට් පෙත්සම ගොනු කරන සුනිමල් ජයන්ත රුද්රිගු මහතා ව්යවසායකයකු වන තමා ‘මහින්ද චින්තනය’ යටතේ දේශීය ව්යාපාර වැඩිදියුණු කිරීමට රජය ලබා දුන් සහාය යටතේ ඇඹිලිපිටිය මහගම ප්රදේශයේ මෙට්රික් ටොන් 730,000ක තිරිවානා නිධියක් කැණීම සඳහා නීත්යානුකූලව ලංසු ඉදිරිපත් කර ව්යාපෘතිය ලබා ගත් බව ද පෙත්සම මගින් සඳහන් කර ඇති බවයි වාර්තා වන්නේ.
