නව තරුණ ඡන්දදායකයන්ට ඡන්දය ප්රකාශ කිරීමට හැකි වන පරිදි 2024 වසරේ ඡන්ද හිමි නාම ලේඛනය උපයෝගී කරගනිමින් පළාත් පාලන ඡන්ද විමසීම පැවැත්වීමට නීති සංශෝධනය කිරීමට අමාත්ය මණ්ඩලය විසින් නීති කෙටුම්පත් දෙපාර්තමේන්තුවට උපදෙස් දී ඇති බව නීතිපතිවරයා අද (11) ශ්රේෂ්ඨාධිකරණයට දැනුම් දුන්නා.
ඒ 2024 වසරේ ඡන්ද හිමි නාමලේඛනය ද ඇතුළත් කරගනිමින් පළාත් පාලන ඡන්ද විමසීම පවත්වන ලෙස නියෝගයක් නිකුත් කරන්නැයි ඉල්ලා ගොනුකර තිබූ මූලික අයිතිවාසිකම් පෙත්සමක් අද යළි කැඳවූ අවස්ථාවේදීයි.
පෙත්සම අගවිනිසුරු මූර්දු ප්රනාන්දු, අර්ජුන ඔබේසේකර, ප්රියන්ත ප්රනාන්දු යන ත්රිපුද්ගල ශ්රේෂ්ඨාධිකරණ විනිසුරු මඬුල්ල ඉදිරියේ කැඳවූවා.
පෙත්සම කැඳවූ අවස්ථාවේදී නීතිපතිවරයා වෙනුවෙන් පෙනී සිටි නියෝජ්ය සොලිසිටර් ජනරාල් නිර්මලන් විග්නේෂ්වරන් මහතා පැවසුවේ, තරුණ ඡන්ද දායකයින්ට ඡන්දය ප්රකාශ කිරීමට හැකිවන පරිදි 2024 වසරේ ඡන්ද හිමි නාමලේඛනය උපයෝගී කරගනිමින් පළාත් පාලන ඡන්ද විමසීම පැවැත්වීමට අවශ්ය කරන නීති සංශෝධන සිදු කරන ලෙස අමාත්ය මණ්ඩලය විසින් නීති කෙටුම්පත් දෙපාර්තමේන්තුවට දැනුම් දී ඇති බවයි.
එමෙන්ම මේ වන විට භාරගෙන තිබෙන නාම යෝජනා අවලංගු කරමින් නව නාම යෝජනා භාර ගැනීමට හැකි වන පරිදි එම නීති සංශෝධනය කරන ලෙසට ද අමාත්ය මණ්ඩලය විසින් උපදෙස් දී ඇති බවත් නියෝජ්ය සොලිසිටර් ජනරාල්වරයා පැවසුවා.
ඒ අවස්ථාවේ දී පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ අලි සබ්රි මහතා පැවසුවේ, මෙම කරුණ සම්බන්ධව සුවිශේෂී මහජන අවධානයක් එල්ල වී තිබෙන බැවින් සෑම පුද්ගලයකුටම මෙම නඩුකරයට මැදිහත් වීමට හැකි වන අන්දමින් දැනුවත්භාවය ලබා ගැනීම පිණිස භාෂා තුනෙන්ම පුවත්පත්වල මේ පිළිබඳ තොරතුරු පළ කිරීමට නියෝගයක් නිකුත් කරන ලෙසයි.
එම ඉල්ලීම සලකා බැලූ විනිසුරු මඩුල්ල ඊට අවසර ලබා දුන්නා.
පෙත්සමේ වගඋත්තරකරුවන් ලෙස නම් කර සිටින මැතිවරණ කොමිසමේ සභාපතිවරයා ඇතුළු වගඋත්තරකරුවන්ට නොතීසි නිකුත් කරන බව ද දැනුම් දුන් විනිසුරු මඬුල්ල පෙත්සම ජනවාරි මස 29 වැනිදා කැඳවීමට දින නියම කළා.
දේශවිමුක්ති ජනතා පක්ෂයේ සාමාජික නිහාල් ද සිල්වා මහතා ඇතුළු පිරිසක් විසින් මෙම පෙත්සම ඉදිරිපත් කර තිබෙනවා.
