පොලිස් මත්ද්‍රව්‍ය නාශක කාර්යංශය විසින් අත්අඩංගුවට ගෙන අධිකරණමය කටයුතු අවසන් වූ මත්ද්‍රව්‍ය තොගයක් දහනය කර විනාශ කිරීම අද (27) සිදුකෙරුණා.
පුත්තලම – වනාතවිල්ලුව, ලැක්ටෝවත්ත ප්‍රදේශයේ සකසා ඇති දහන උදුනේ දේ මෙම මත්ද්‍රව්‍ය තොගය විනාශ කර දැමුවේ හලාවත දිසා විනිසුරු හර්ෂ ඩී.සිල්වා මහතා සහ බලපිටිය දිසා විනිසුරු සංජීවනී පතිරණ මහත්මිය ඉදිරියේදී යි.
බලපිටිය දිසා අධිකරණයේ විභාග කර නඩු කටයුතු අවසන් කරන ලද හෙරොයින් මත් කුඩු කිලෝ ග්‍රෑම් 22යි ග්‍රෑම් 888ක්, විදේශීය දුම්වැටි 7, 600ක් ද හලාවත දිසා අධිකරණයේ නඩු කටයුතු අවසන් කරන ලද කේරළ ගංජා කිලෝ ග්‍රෑම් 33යි ග්‍රෑම් 172ක් සහ ගංජා කිලෝ ග්‍රෑම් 247යි ග්‍රෑම් 940ක් මෙලෙස දහනය කර විනාශ කළා.
පොලිස් මත්ද්‍රව්‍ය නාශක කාර්යංශය භාර ජ්‍යෙෂ්ඨ නියෝජ්‍ය අශෝක ධර්මසේන, මත්ද්‍රව්‍ය නාශක කාර්යංශයේ අධ්‍යක්ෂක චන්දන හේරත් සහ රජයේ රස පරීක්ෂක දෙපාර්තමේන්තුව සහ අන්තරායක පාලක මණ්ඩලයේ නිලධාරීන්ද මෙම අවස්ථාවට එක්ව සිටියා.
