2026 නුවරඑළිය මහ නගර සභාව විසින් සංවිධානය කරනු ලැබූ වසන්ත සැණකෙළියේ තාවකාලික කඩ කාමරවලින් ඉවත් කරන අපද්රව්ය බැහැර කිරීමට නිසි ක්රමවේදයක් නොමැතිවීම හේතුවෙන් නගරය මධ්යයේ කොටසක් කසළ ගොඩගැසී අපවිත්ර වී ඇති බවට පාර්ශ්ව රැසක් චෝදනා කරනවා.
මෙවර වසන්ත සැණකෙළිය වෙනුවෙන් ටෙන්ඩර් පදනම මත තාවකාලික කඩ කාමර මිලදී ගත් වෙළඳුන් පවසන්නේ තමන්ට පානීය ජලය, වැසිකිළි පහසුකම් හෝ වෙනත් පහසුකමක් හෝ මෙවර සපයා නොමැති බවයි.
ඔවුන් පවසන්නේ මාර්ග සංවර්ධන අධිකාරිය මඟින් ටෙන්ඩර් පදනම මත අදාළ කඩ කාමර මිලදී ගත් බවත්, ඒ හේතුවෙන් නුවරඑළිය නගර සභාව විසින් තාවකාලික කඩ කාමරවලින් ඉවත් කරන අපද්රව්ය රැගෙන යෑම ප්රතික්ෂේප කරන බවයි.
ඔවුන් වැඩිදුරටත් පවසන්නේ පසුගිය වසරවල එවැනි තත්ත්වයකට මුහුණදීමට තමන්ට සිදු නොවූ බවත්, මාර්ග සංවර්ධන අධිකාරියේ සහ නුවරඑළිය නගර සභාවේ කඹ ඇදිල්ල හේතුවෙන් මේ වනවිට නුවරඑළිය නගර මධ්යයේ කොටසක් කසළ අංගනයක් බවට පත්ව ඇති බවයි.
අප මේ සම්බන්ධයෙන් නුවරඑළිය නගර සභාවේ කොමසාරිස්වරයාගෙන් විමසීමක් කළ අතර එහිදී ඔහු සඳහන් කළේ, නගර සභාවේ අනුමැතියකින් තොරව අදාළ තාවකාලික කඩ කාමර ලබාදී ඇති බවත්, ගොඩගැසී ඇති කසළ ඉවත්කරන ලෙසට නගර සභාව මඟින් මාර්ග සංවර්ධන අධිකාරිය වෙත ලිඛිතව දැනුම් දී ඇති බවයි.
ඒ, අනුව මේ පිළිබඳව අප මාර්ග සංවර්ධන අධිකාරියෙන් ද විමසීමට කටයුතු කළ අතර, එහිදී මාර්ග සංවර්ධන අධිකාරිය සඳහන් කළේ නගර සභාවෙන් එවැනි දැනුම්දීමක් සිදුකර ඇති බවයි.
එහිදී නගර සභාව විසින් ටෙන්ඩර් ගාස්තුවෙන් 25%ක මුදලක් ඉල්ලා සිටි බවත්, එම මුදල වෙන් කිරීමට තමාට බලතල නොමැති බවත් මාර්ග සංවර්ධන අධිකාරියේ ඉංජිනේරුවරයා සඳහන් කළා.
කෙසේ වෙතත් මේ පිළිබඳව නගර සභාව සමඟ සාකච්ඡාකර විසදුමක් ලබාගැනීමට කටයුතු කරන බවත් ඉංජිනේරුවරයා වැඩිදුරටත් පැවසුවා.
