ගුවන් ගමනක් අතර තුර ඇති වූ හදිසි රෝගී තත්ත්වයක් හේතුවෙන් රෝහල් ගතකළ ඉන්දීය ක්‍රිකට් ක්‍රීඩක මායන්ක් අගර්වාල් රෝහලෙන් පිටව ගොස් ඇති බව වාර්තා වනවා.
ප්‍රතිකාර සඳහා ඔහු ඇතුළත් කළ අගර්තාලා රෝහලෙන් ඊයේ (31) පස්වරුවේ පිටවගොස් බැංගලෝරයට පැමිණ ඇති බවයි ඉන්දීය මාධ්‍ය වාර්තා කළේ.
බැංගලෝරයට පැමිණි අගර්වාල් වැඩිදුර පරීක්ෂණ සඳහා පෞද්ගලික රෝහලකට ගොස් ඇති බව සඳහන්.
ඔහු ආපසු බැංගලෝර් වෙත ගමන් කරන කාලය අතර තුර ඔහුව වේදනා රහිතව තබාගැනීම සඳහා වෛද්‍යවරුන් ඔහුට එන්නත් කිහිපයක් ලබා දී ඇති බවට ද තොරතුරු වාර්තා වනවා.
පසුගිය අඟහරුවාදා අග්‍රවාල්, දිල්ලි වෙත ගමන් කරමින් සිටින අතර තුර පානීය ජලය ඇති බවට විශ්වාස කළ බෝතලයකින් දියර වර්ගයක් පානය කිරීමෙන් පසු ඔහුට හදිසි රෝගී තත්ත්වයක් ඇතිව තිබෙනවා.
අනතුරුව රෝහල් ගතකළ ඔහු ප්‍රතිකාර සඳහා දැඩිසත්කාර එක්කයට ඇතුළත් කෙරුණා.
රංජි කුසලාන ක්‍රිකට් තරගාවලියේ දී මායන්ක් අගර්වාල් විසින් කර්නාටක පිළ මෙහෙයවනු ලැබූ අතර, මෙම තත්ත්වය මත කර්ණාටක කණ්ඩායම තරගාවලියේ හෙට මුහුණ දෙන තරගය වෙනුවෙන් ඔහුට එක්වීමට අවස්ථාව මඟ හැරී ගොස් තිබෙනවා.
මේ අතර අගර්වාල් සිය නිල ඉන්ස්ටර්ග්‍රෑම් ගිණුමට සටහනක් තබමින් සඳහන් කළේ,
“මට දැන් හොඳක් දැනෙනවා, නැවත පැමිණීමට සූදානමින්. ආශිර්වාදය, ආදරය සහ සහයෝගය සඳහා සියලු දෙනාට ස්තූතියි, යනුවෙන්.
