ශ්‍රී ලංකාව සහ බංග්ලාදේශය අතර පැවැත්වෙන විස්ස තරගාවලියේ අනිද්දා (13) පැවැත්වීමට නියමිත දෙවන විස්සයි විස්ස තරගය සඳහා ප්‍රවේශ පත් කවුළුවෙන්; ප්‍රවේශ පත් නිකුත් කිරීම අද (11) ආරම්භ වුණා.
ඒ, මෙම තරගය පැවැත්වීමට නියමිත රංගිරි දඹුල්ල ජාත්‍යන්තර ක්‍රිකට් ක්‍රීඩාංගණයේ ස්ථාපිත කර තිබූ ප්‍රවේශ පත් කවුළුවෙන්.
ප්‍රවේශ පත් මිලදී ගැනීම සඳහා අද උදෑසන සිට දඹුල්ල ක්‍රිකට් ක්‍රීඩාංගණය ඉදිරිපිට දිගු පෝලිම්වල රැඳී සිටීමට ප්‍රේක්ෂකයින්ට සිදු වුණා.
එවැනි තත්ත්වයක ප්‍රවේශ පත් මිලදී ගැනීමට පැමිණි ප්‍රේක්ෂකයින් සහ ප්‍රවේශ පත් කවුළු නිලධාරීන් අතර උණුසුම් තත්ත්වයක් හටගත්තා.
ඒ, රුපියල් දහසක මුදලකට මිල නියමකර තිබූ ප්‍රවේශ පත් කිසිවක් නොමැති බවට ප්‍රවේශ පත් කවුළු නිලධාරීන් පැවසීමත් සමඟයි.
එහිදී එම නිලධාරීන් පවසා ඇත්තේ රුපියල් දහසේ ප්‍රවේශ පත් සියල්ල අලෙවි අවසන් බවයි.
කෙසේ වෙතත් ප්‍රේක්ෂකයින් එහිදී කියා සිටියේ අද (11) දිනයේ එම ප්‍රවේශ පත් කවුළුවෙන් රුපියල් දහසේ ප්‍රවේශ පත් එකක් හෝ නිකුත් නොකළ බවයි.
ප්‍රවේශ පත් කවුළු නිලධාරීන් මෙහි දී ප්‍රේක්ෂකයින්ට පවසා ඇත්තේ, රුපියල් දහසේ ප්‍රවේශ පත් මාර්ග ගත ක්‍රමයට ඔස්සේ සහ පල්ලෙකැලේ ක්‍රීඩාංගණයේ ස්ථාපිත කර තිබූ ප්‍රවේශ පත් කවුළුවෙන් අලෙවි වී අවසන් බවයි.
එහිදී ප්‍රේක්ෂකයින් පවසා සිටියේ ප්‍රවේශ පත් නිකුත් කිරීමේ දී යම් වංචාවක් සිදුවන බවයි.
මේ අතර දෙවන විස්සයි විස්ස තරගයේ ප්‍රවේශ පත් සියල්ල අලෙවි වී අවසන් බවයි ශ්‍රී ලංකා ක්‍රිකට් ආයතනය අද පස්වරුවේ දැනුම් දුන්නේ.
